兩大影帝任達華與林家棟到將軍澳電視城出席主演網劇《冒險王衛斯理》記者會,講到二人少有亮相TVB,任達華表示要多謝網絡這個新平台:「網劇都算係一個新趨勢,係一個好年輕嘅平台,令我都多咗年輕觀眾支持!」家棟笑言「10億點擊率」等新字眼聽得多,自己亦未接觸過,希望今次演出能得到觀眾支持。
在劇中演奸角的家棟,講到張秀文自爆經常被他粗暴對待,他笑言:「唔係經我手,係特技人做嘅。」任達華聞言笑說:「家棟係處女座嘅,我呢啲獅子座嘅過到關咪得囉,佢呢唔得就係唔得,所以咪辛苦到張秀文囉,不過就係咁先愈拍愈好,因為佢有要求!」
問會否叫囡囡支持?任達華說:「睇我就得,我嗰啲戲就可以睇,家棟、伍允龍嗰啲就唔好喇!」講到囡囡早前被媒體影到放學後的行蹤,任達華說:「佢哋有自己生活嘅,佢嘅生活冇問題,不過下次記者朋友唔好行咁近,遠少少啦!」
|