結咗婚都唔公布 張寶兒想玩秘婚？

藝人張寶兒（Bowie）出席香港貿易發展局舉行的香港國際鑽石、寶石及珍珠展新聞發布會，為大會示範多款參展作品。受訪時，她戴上價值約六千萬的藍寶石頸鏈和約三百萬的戒指，她坦言第一次戴上貴重的珠寶，感到大壓力，平時會挑選比較細粒的珠寶戴：「可能我未夠成熟，我媽咪會Carry到大粒啲。（男友有冇送過珠寶畀你？）冇㗎唔會，我唔特別好珠寶，畀我揀寧願佢多啲時間陪我，或者煮餐飯我食，對我嚟講同珠寶一樣咁寶貴。（送都唔區？）都係唔好住，太大份禮唔知點還，我爸媽都未送，我覺得盡量唔好係呢方面花錢。（求婚都有戒指？）好遠，唔係好想像得到，誠意未必用金去表達。」

談及日前Bowie和男友袁偉豪被東網獨家影到與女方家長拜年，她直言唔算好事近：「我都有同好多朋友嘅家長食飯，大家仲專注事業、未咁快談論呢樣嘢住。（親戚有冇講？）又冇，佢哋講去邊旅行多。（媽媽畀100分佢？）哦，如果我係喜歡，佢會畀我選擇我喜歡嘅事同人，所以唔會阻擋我。」講到堪輿學家麥玲玲指她今年或出年有機會與男友結婚，她笑說：「唔係，佢話我有機會結婚咋嘛，冇話同邊個。（又話結婚旺到男友事業？）多謝，自己本身基督徒，唔會特別聽呢啲嘢，但佢有呢個睇法可能有理據，但都冇所謂，聽一聽當有個資訊。」

她坦言未去到談婚論嫁階段，亦明白大家對他們的關心，但專注事業是暫時的方向。問可會結咗婚先公布？她笑言：「如果有都唔話畀你聽！暫時都未有呢個諗法。（現階段同你求婚應唔應承？）要睇求婚當時咩狀態。（咩狀態下應承？）我覺得我事業上未有好大突破，仲未Ready好，要突破咗先知。」