影帝林家棟、日籍演員池內博之、廖子妤及導演李安兒子李淳等今日雲集九龍灣出席新片宣傳活動。由於今次劇情交代扮飾警察的家棟四出追查案件真兇,不少戲份都在「垃圾崗」拍攝,一眾演員向導演鄭保瑞送上屎型蛋榚,認真應景!
家棟孖住廖子妤受訪。他形容是次拍攝是入行以來最辛苦一次:「要交代我不斷摷垃圾,導演又對垃圾同Raw嘅感覺情有獨鍾,每日有15車垃圾到場,我又淋足十幾日雨,最高紀錄開足19個鐘,試過拍打戲拍到隻手腫咗。」
家棟更透露池內因此病倒:「我本身身體唔係咁好,仲要同佢好近距離講對白,都驚俾佢傳染。而我生日嗰日就喺一條爆咗嘅屎渠隔嚟摷垃圾渡過。」
被嫌我跑得慢
至於廖子妤今次扮演「獨臂毒犯」,經常要拍追逐場面:「大家嫌我跑得唔夠快,但已經係跑得最快嘅紀錄!」她又笑言有場「瞓地戲」:「佢哋事前已洗地,但我瞓落去都係成面沙,好似磨沙咁,返到屋企皮膚都細緻咗。」
呻「冇啖好食」
至於池內今次扮演拾荒者,為角色造型狂減30磅,期間「冇啖好食」又要做運動,不過他打趣電影拍完會要求導演請食飯。談到病倒,他表示:「小感冒而已,不過日本沒有香港現時的天氣,今次很辛苦。(嚇怕你?)不會,日後都跟着導演走。」
|