蘇永康傷耳影響表現 陳柏宇上台緊張就出事

蘇永康、陳柏宇(Jason)及側田等，昨晚於灣仔參與新城台慶音樂會，當中Jason太太Leanne也有到場支持。蘇永康大唱日文版《酒紅色的心》，搞到同台的側田想唱也跟不上，被蘇永康笑他話：「知你鍾意搶咪！下次我唱韓文。」

蘇永康騷後透露今年好多外地騷，之後會去佛山、新加坡及美國開騷，最想返香港再開個唱，「新加坡之行已計劃扶老攜幼同行，享受家庭樂，個仔又鍾意游水、好易搞，他每日的氣力游20分鐘！」蘇永康更自爆大前晚在家清潔耳朵時，不慎用棉花棒弄傷左耳，間接影響這晚的表現，他說：「撩耳時覺得有點痛，發現棉花留在耳道，剩下膠棒，雖然用眉鉗取出棉花，但耳仔不停流血，睡醒見枕頭留下血痕，聽覺又矇矇地，我幾驚失聰，立即去睇醫生，好彩檢查後知道無傷到耳膜。幾廿歲人先犯這些錯誤，清潔耳垢應該搵醫生，這行若果耳仔出問題就等如破產失聲，好危險﹗」

Jason大讚這次很好玩，但本身太容易緊張，做大騷要唱一、兩首熱身才能進入狀態，「上到台腎上腺飆升，會唱高音啲，低音無咗，原來側田都是這樣，我變得安心了，高手都是這樣，哈哈。」