【男友要識做喇】高海寧講到明要生兩個

藝人高海寧（高Ling）及丁子朗出席商場新春活動，氣氛熱鬧。高海寧早前驚現「鬼剃頭」，她坦言康復中：「冇特別去照鏡（鬼剃頭）喇，但依家髮量係ok嘅。深信佢會生番出嚟，已經唔係第1次咁，可能冇咁驚，但喺馬來西亞拍戲發現時，都有睇醫生同打針，我就盡量放鬆自己。（男友好擔心？）又冇，不過媽媽同爸爸即刻停工，飛過嚟陪我、煮飯畀我食，仲話只係可以為我做呢啲，令我好感動。」

談到稍後開劇扮演8歲男孩母親，高海寧笑言要向媽媽取經：「我未做過人母嘛，不過我細個成日幻想自己22歲結婚、25歲生小朋友，依家只可以隨緣，但我點都會生嘅，最好生兩個。」

另外，擔任活動司儀的區永權今年「過肥年」：「留喺香港因為初一及初四都有騷要做。初四幫古天樂影迷會團拜做司儀，我帶埋兩個仔去，佢哋𢭃咗古仔封大利是，我見到都』『嘩』一聲，實數唔好講喇。我個仔又好鍾意同啲大哥哥玩，所以見到古仔勁興奮。」他坦言要努力工作，為小朋友的生活及教育費努力。