陳瀅何雁詩係地獄廚神 劉佩玥未入過廚房！

藝人陳瀅（Jeannie）、劉佩玥（Moon）與何雁詩（Stephanie）是娛圈好姊妹，Jeannie與Stephanie更曾是同居密友，三人決定趁農曆新年學好廚藝，為未來學做賢妻！一向喜歡吃海鮮的Jeannie，率先入廚房跟師傅學做「黃金蝦」，見她有板有眼，面對大火爐頭都絕不怯場，而Stephanie則學整「避風塘炒蟹」，雖然Stephanie細細粒，但炒蟹時都似模似樣，而Moon則挑戰難度最高的「發財好市」！

三人互相試食對方的成品，亦不忘互爆入廚的黑歷史，Moon爆料指Jeannie試過煎餃子給她吃，在客廳等食時聞到一陣燶味，走入廚房見到餃子已被煎到變燶：「佢仲好自得其樂咁同我講，『就有得食㗎喇！』」Stephanie亦踩一腳，大爆Jeannie連麵包都會焗燶：「試過佢焗完麵包第二日，我打開個焗爐，見到有舊黑色嘢喺入面，原來係佢見個麵包焗燶咗，冇食就擺喺入面冇執！」Jeannie則反擊，爆料指Stephanie冇手尾，會擺到食物變壞發霉，Moon補充：「佢飲唔晒啲湯就會擺喺度，擺到發霉佢都唔拎去洗！」被問到Moon的廚藝如何，Jeannie與Stephaine就表示不知道，因為Moon從來都未有在她們面前行入廚房！

過去一年三人都有得失，Stephanie直言去年是非纏身，負面新聞不斷令她情緒爆發，她坦言事過境遷，情緒病亦已康復，目前與男友鄭俊弘感情穩定。單身一年的Jeannie直言享受，目前未遇到好對象，覺得感情事要隨緣。Moon則緋聞不斷但全都是無米粥，她亦直言不恨拍拖，指身邊已經有很多人錫她。