Mall姐自爆有人追！宣萱落閘趕絕醉酒佬

藝人宣萱早前憑無綫劇集《不懂撒嬌的女人》「Mall姐」一角榮登馬來西亞視后寶座，更成為台慶頒獎禮視后大熱。最近她又連續出席各大活動，事業再創高峰，但單身多時的她感情還未有着落。對於拍拖、結婚，她自言隨緣：「我身邊好多人結咗婚都唔開心，呢啲故事聽得太多，甚至可能我早結婚都會係咁，所以覺得唔一定要有婚姻，依家我好清楚自己要啲咩。」她自爆雖然有追求者，但與對方完全不夾：「唔夾嘅我寧願自己一個，好多朋友都好羨慕我話想旅行就去旅行。（有幾唔夾？）有啲人鍾意晚晚飲到醉一醉，我自己就唔煙唔酒嘅，淨係想要平淡嘅生活。」

做厭人質想變奸

提到近年生活無憂，又可以揀劇本，宣萱謙稱比上不足比下有餘：「我唔叻，大把人有錢過我，不過我嘅一分一毫都係自己搵番嚟，同埋最緊要係做自己鍾意做嘅嘢。」她又指對即將舉行的台慶頒獎禮抱平常心，雖然呼聲極高，但她卻直言自己機會不大，更指結果隨時出乎意料：「畀我的話我會好驚喜，但觀眾就冇驚喜喇！」她亦表示最想繼續讓觀眾有新鮮感：「好想做奸角，之前喺內地拍劇試過做，日日害人、打人，嗰幾個月好開心。好想喺無綫做一個角色，由好人慢慢變成衰人。（咁咪冇得再被綁架、做人質？）我綁人唔得咩？我做咗廿六次人質喇！（唔想破自己紀錄？）實有機會！」