入圍建築界奧斯卡 吳彥祖想重操舊業？

男神吳彥祖除咗演技精湛，本身亦係一個學霸，事關佢係美國俄勒岡大學建築學系畢業嘅高材生。近期吳彥祖就同老友馮德倫一齊參加內地真人騷《漂亮的房子》，實行做番佢嘅老本行！

吳彥祖同佢嘅設計團隊喺中國河北木蘭圍場，以80萬元人民幣（約97萬港元）嘅預算，為當地嘅村民同小朋友設計咗一個可以居住嘅圖書館「木蘭坊」，呢一個圖書館就用咗傳統蒙古包作為藍本。由畫圖、測量、削木去到組裝，都係由吳彥祖同佢嘅團隊一手包辦。而「木蘭坊」仲入圍有「建築界奧斯卡」之稱嘅英國皇家建築師學會獎（RIBA International Prize 2018）。

吳彥祖今日就喺社交網站公布咗呢個好消息，佢話今年係佢重返設計根源嘅一年，由佢設計嘅「Tantō」汽車，成為咗今年Sema車展嘅十大汽車之一。另外，喺真人騷入面建造嘅「木蘭坊」亦都有份角逐「英國皇家建築師學會獎2018」，佢仲問係咪應該考慮做番設計師添！