张曦雯甩拖转軚 破不宣婚言

etin

艺人张曦雯早前经历情变，她坦然面对，承认与前度未有及时处理问题，以致分手收场。分手初期，回复单身难以习惯，亦感到辛苦。她又表示其“不婚观念”有变，希望尽快觅得合适的另一半，不排除随时步入教堂的可能性。女神张曦雯（Kelly）于播映中的无綫新剧《卧底娇娃》中，饰演一名心理学及微表情专家，与现实生活中的她最相似之处是懂得观人于微，她打趣说：“有时会同自己讲，睇人唔好咁准得唔得呀？呢样可能同我父母年轻时要工作，交我畀一位姨姨日间暂托有关，呢类小朋友好叻睇人眉头眼额。（拣男友都好准？）会好易知佢真唔真诚啰！”

剧情交代她与陈滢、罗毓仪组女团查案，故拍摄期间还要利用休息时间去排练跳唱，凡事力求完美的Kelly甚至自掏腰包跟老师学唱歌。其实自去年开始，她几乎用尽心力于工作上，为剧集《侠医》开工期间还要兼顾电视电影的拍摄，中间加插两套剧集宣传工作，以致未有及时处理与前度Mark日积月累的问题，结果分手收场！她坦言：“我谂所谓嘅暗涌唔系一时发生嘅，有时选择唔好面对。人就系咁，有（男友）嘅时候会觉得系应该，但时间过咗就过咗，经历咗上年发生嘅一切，我更加觉得人生有剧本，要发生嘅始终会发生！”幸而她与Mark如今再见亦是朋友，分手更是双方认为最舒服的决定。问到会否考虑再续前缘？Kelly爽快回应：“呢刻冇呢个谂法。（有冇少少后悔分手？）冇！反正大家都有付出过、开心过！”

曾几何时，她曾明言不追求婚姻生活，今次经历情变却让她改变想法：“开始有少少急，可能因为好多年冇试过单身。（好唔惯？）起初好辛苦，始终以前惯性有人喺身边，突然间冇咗喎！（分手时冇谂到会有咁嘅感觉？）可以咁讲，因为我成日宅喺屋企，唔锺意出去玩，另一半就系我最好嘅朋友嘛。”Kelly不讳言身边已出现追求者，并强调情变未有为她造成阴影：“啱就可以喇，不过我好耐冇试过单身，想喺呢段时间谂清楚自己想要啲乜。（有乜择偶条件？）我份人好急，好多嘢等唔切都会自己做咗先，或者想试吓小鸟依人，放慢脚步畀机会人哋照顾吓我，所以对方要好主动！”

至于今次挑战演出轻喜剧，Kelly、陈滢及罗毓仪朝夕相处培养了姊妹情，其中多场歌舞场面则高下立见，Kelly笑说：“估唔到罗毓仪系我哋3个之中最唔擅长跳舞嗰个，不过佢喺唱歌同乐器方面就最叻。（你会唔会因此想试吓进军乐坛？）细个时有接触跳舞，今次之后觉得试过就算，呢方面真系完全冇兴趣，唔系自己长处就唔好试喇，况且年纪大，开工时都成日畀马贯东笑，问我哋组女团会唔会太老，哈哈！”