陈炜47岁离婚惊冇人要 冇谂过与医生老公生B：佢自己有啦

etin

96年亚姐冠军陈炜伙拍宣萱合作台庆剧《巨塔之后》互斗演技再成热话。明年入行30年的她，接受电台访问，父母份外痛锡她这位孻女，早于18岁时已希望她选港姐，她说：“嗰时太细个啦，一来觉得自己学历唔够，二来爸爸讲嘅嘢唔听。”入行后，经历亚视低潮时，她对家人只报喜不报忧，及至08年退出娱圈4年，婚姻出现问题时，也没告知双亲，她又说：“妈咪2009年开始肝癌，2011年离开，嗰阵除咗我返嚟香港，亦有接妈咪去台湾做Treatment，佢都有同我前夫一齐生活嘅时间。其实妈咪系睇到我同前夫点相处，好记得佢曾经讲过一句‘如果唔啱，分开啦。’听到佢呢句，突然觉得佢好豁达，唔似以往我心目中忍耐爸爸嘅妈咪，所以最后我决定同前夫分开，都系因为妈妈呢句说话而释怀。”

2012年，陈炜与台湾前夫离婚后回港复出转投无綫，原来当现任丈夫陈医生出现前数年，她一直心灰意冷：“讲真，识我老公时已经47岁，嗰时好灰，感觉47岁可能真系冇人要啦，感情冇任何谂法，所有时间畀晒工作，用工作麻醉自己，唔好有时间谂嘢。”及至拍《法证先锋IV》因黄智贤认识了老公，陈医生的细心，令她由衷感动：“嗰时只系啱倾未拍拖，曾经有一日开工经痛，系痛到头晕休克成身标冷汗好辛苦。当挨完朝早外景返屋企休息，我打电话问陈医生应该食啲乜嘢药。结果到中午，佢走咗嚟我屋企送药，同埋送咗碗粥，觉得佢真系关心我喎，先至慢慢开始。”陈炜90岁的爸爸于2022年初病逝，她庆幸当时有另一半陪伴外，亦感激对方爱屋及乌：“之前爸爸坐骨神经痛到行唔到，我开工冇时间，陈医生系特登响Lunch Break由将军澳去到屯门，照顾我爸爸同帮佢打针，每日睇住佢，我真系好感激我老公。”

陈炜说过跟台湾前夫的婚姻失败是缺乏沟通，而她与现任丈夫都经历过一段婚姻，她发现与陈医生最夹就是“咩都摊开讲”:“虽然我同佢都好I （内向型人格），但我哋相处会无所不谈，每日发生嘅嘢都分享，佢好清楚我，我又好清楚佢，大家就唔使估嚟估去，我所有拍戏拍档，尤其系男对手，都一定会识得我老公。”虽然一拍拖就认定对方，但她笑老公于她48岁生日才求婚是有点迟，她说：“事前冇倾过，但少少Feel到，唔踢爆佢啫。点Feel到？47岁已经觉得系佢啦，哈哈！迟咗一年喇，因为大家都认定咗对方，要犹豫要谂系最初拍拖阶段，观察佢一段时间，已经决定好啦，争在佢未求婚啫。”问夫妻二人婚前有没有想过有下一代，她说：“佢自己有下一代啦，我真系冇乜点谂过，依家我哋两个几自由呀。”