麦明诗晒坐月吸氧照 大爆盛劲为Ready再造人

etin

“十优港姐”麦明诗今年3月为机师老公盛劲为（Keith）诞下仔仔荣升人母，获带挈有劲多母婴sponsor嘅佢，依家频频出post变新手妈妈KOL，日前（11日）迎嚟佢生B后第一个母亲节，自然感慨良多，佢就一口气晒出大批生活照，抱住囝囝好感触咁留言：“多谢你送花同我庆祝我第一个母亲节，仲送咗扎花嘅size大过你自己人仔。点知你送送吓就唔记得咗自己送紧花，狂嗌要饮奶。之后仲同婆婆一齐庆祝母亲节，婆婆话今次系佢人生中最开心嘅母亲节，养儿方知父母恩，我都慢慢体会到做妈妈真系不容易。thank you 妈咪。”麦明诗除咗感恩父母照顾外，佢更晒出自己坐月时吸氧气嘅相，令网友戥佢生BB辛苦。至于老公盛劲为亦系咁晒相，就好似一家三口陪麦明诗父母上船出海、推BB车相、单手抱仔戴太阳眼镜照等，Chok到令网友尖叫，更笑言：“努力学习紧点样将融入生活而不失霸气。”不过麦明诗就转载老公推BB车相并爆料：“当日盛生拣呢个STROLLER，话因为佢个DOUBLE MODE，可以载到两个BB……”似暗示老公已经Plan定唔只生一个，两公婆随时三年抱两！