江嘉敏凡事一脚踢培养求生技能 自由搏杀获家人锡住荷包

etin

艺人江嘉敏日前于无预警下宣布“脱无”作独立发展，她坦言未习惯兼经济不稳，幸获家人支持，更锡住她的荷包。虽然目前凡事一脚踢，但她笑言感情方面采开放态度，宁要专一男都不要靓仔。离开无綫至今月馀，江嘉敏直言尚未适应：“求生技能低咗，以前我只需要专注研究剧本及角色，化妆、服饰同夹期等全部都有专人帮手，畀人凑惯咗嘛。（点形容依家心情？）辛苦啰，好多嘢要去学，不过冇后悔今次嘅选择。最紧要学做人，尤其待人接物方面好惊得罪他人，有朋友问我：‘点解成日翻眼？’呢个系我小坏习惯，冇恶意㗎，但真系要注意。”选择于市道低迷时离开无綫这个“舒适的家”，江嘉敏坦言目前经济状况不稳定：“尽做啦，好彩屋企人都好支持我，睇得出父母好心痛自己，话出去食饭佢哋答‘多味精’、话去旅行佢哋就会讲‘腰酸背痛’，所有嘢都帮我悭住个荷包，我妈咪仲暗示叫我暂时唔使拎家用番去，我都好老实不客气，哈哈！希望尽快上轨道。”

回顾留守无綫的9年光景，江嘉敏自言得的多、失去也不少：“以前拍剧陪屋企人嘅时间好少，睇住父母白发愈嚟愈多嘞，真系要好好珍惜大家相处嘅光阴。最难忘系试过我生日，屋企人知我锺意打边炉，专登买到成枱美食，结果我返唔到去食饭，我个妹仲特登订咗生日蛋榚，好失望咁问我可唔可以返一返屋企、切咗饼先？”她坦言如今回复自由身，相信日后时间掌控较容易，可多做乖乖女及好家姐，尽享天伦之乐。至于是否多了时间可发展感情生活，她笑说：“我open㗎，呢排都识多咗朋友，我锺意才华型多啲，性格要正能量、专一及孝顺，我真系唔睇样嘅，靓仔唔襟睇嘛。”

当问到日后最希望向哪方面发展，江嘉敏爽快回应：“电影、舞台剧，甚至司仪，所有嘢未试过唔知啱唔啱自己，所以想创造任何嘅可能。（会再签番间经理人公司？）随缘，都有朋友帮手牵綫嘅，但都要坐低倾，睇吓夹唔夹到再算啦。（日后再同无綫合作？）临走前同珍姐（曾励珍）及乐小姐（乐易玲）倾过几次，佢哋好关心我，问我踏入30岁后有冇谂过自己想点，又话无綫随时都欢迎我，不过就提醒我要努力减肥呀，唔可以偷懒呀，哈哈！”