杨茜尧因反叛入TVB 大爆杨明曾坐爆训练班玻璃枱

etin

艺人杨茜尧近日受访时大谈入行趣事及经历，她称入行前TVB对她来说是一个很遥远的地方，她解释：“因为我细个，我爸爸好锺意睇亚视，唔畀我哋睇无綫，我有个好反叛嘅行为，你唔畀我睇，我要入去演戏，有一日你就要焗住睇我演嘅剧，有一日真系有朋友搵我一齐参加无綫嘅训练班，所以就入咗去。”提到训练班难忘事，杨茜尧想起杨明，她称一直当对方是细佬：“课室有张玻璃枱，佢成日坐上去，终于有一日佢坐爆张玻璃枱，我哋成班同学夹计，将啲玻璃碎由班房偷运出去丢咗佢，而唔畀老师知道，最后好成功，训练班完咗，下一期新人再嚟，都冇人发现冇咗块玻璃，我记得当年系每人袋少少走咗出去。好美好回忆，放饭时候冇乜钱，超巿好多试食，我哋唔食饭，就去试食食饱，成班十几人去食，唔够就叫姐姐加多啲畀我哋食，又会组团去旅行，好开心。”

谈到拍了这么多部剧，哪部剧最大突破，杨茜尧首选2006年的剧集《赌场风云》，因该剧对她整个人影响深远：“拍呢套剧之前嘅我系一个比较内向嘅人，我从来唔会着裙同背心去影相，如果你要我着我唔影，嗰时我嘅性格系咁，跳唔出个框框，我有少少倔强，我唔锺意就唔做，所以《赌场风云》令我放低咁倔强嘅性格，因为个角色要参加选美，同埋系一个隆胸女仔，所以不停要喺镜头前展示自己美态，同埋要跳出自己好守旧嘅框框，镜头成日拍我个胸，同埋要好短嘅裤同裙，完全打破真实嘅我，所以拍完套剧之后，我放得好开，乜都会试吓，系一个好大影响同转变，冇呢套剧未必有今日嘅我，嗰套剧令我开窍。”

至于合作演员中对她最大影响的她，她提到汪明荃，两人曾在剧集《婚前昏后》中饰演母女：“佢系一个好准时同敬业嘅演员，但只要你做好自己，佢就会欣赏你，我一直都表现得好好，但有一日我唔舒服，心不在焉，集中唔到精神演戏，第二日佢同我讲‘你寻日做咩嘢，我见到你演得好差，你平时唔系咁，你唔好呀，你唔好骄傲，你要畀心机，演员一骄傲好容易走下坡’佢讲完呢番说话之后，我就谂，就算演员病都好，但观众唔会知你病，作为一个演员，你几攰、几唔想讲嘢都好，都唔可以喺镜头前表现出嚟，我同自己讲，我一定要撑，一系唔做，一做就要做好。”