江嘉敏离巢做新丁：条路刺激又好玩

etin

效力无綫9年的艺人江嘉敏决定离巢，她坦言曾经挣扎，离开安稳的“家”往外闯，心里一定会彷徨，但希望趁30岁以“2025年新人”身份重新出发。她自爆日前试镜时竟有怕丑的感觉，不禁说：“我就系想搵番呢啲感觉，之后条路会刺激又好玩。”无綫小花江嘉敏凭首套剧集《亲亲我好妈》的清纯学生妹形象引起观众关注，演技受肯定，之后剧接剧，拍过多部重头剧如《夸世代》、《杀手》、《果栏中的江湖大嫂》、《大酱园》、《新四十二章》及《金式森林》等，更在剧集《兄弟》一尝女主角滋味。江嘉敏可塑性甚高，更为《新》剧作出牺牲，剪了一头短超发于此剧及《武林》做打女，周身伤仍坚持亲身上阵，更拍到要瞓担架床兼吸氧气，前年她终挨出病来，经常出入医院。

不过，江嘉敏突然决定离巢，刚完成合约的她决定不再续约，继苏韵姿、朱智贤、余思霆、蔡嘉欣及刘温馨后，再一位“脱无”小花！前几天，她返回电视城完成最后剧集的后期工作，特意走匀全城派“散水饼”道别，昨日她接受访问时说：“嗰日返去派散水饼之馀，都希望同啲同事影吓相做纪念，始终喺呢间公司9年，大家感情好好。嗰日我专登化咗个靓妆返去见大家，因为好多同事唔知我离开，我净系话请大家食饼，佢哋又唔睇饼上面嘅字，以为我结婚派饼！”

由于江嘉敏在无綫一直剧接剧，加上有做综艺节目，大家得知她离开均大感愕然：“啲同事以为我讲笑，我话我真系走呀！跟住大家就有啲眼湿湿，我都差啲忍唔住喊咗出嚟，大家合作咁多年，真系好唔舍得。平时返工觉得公司冇咩特别好行，但嗰日派完饼行咗成个TVB，发觉原来好多地方未去过。”问到为何突然有此决定，她指事前曾跟高层曾励珍及乐易玲倾谈，但她想趁后生改变一下：“30岁都算后生呀！想试多啲唔同嘅嘢，出到去点、有咩做，我真系未知㗎！但我想有转变，好似当年20岁成日拍MV、广告，就系想有转变，咁啱有个机遇畀我拍TVB剧，到依家30岁拍过好多剧，我觉得好多可能性可以发生，例如跳舞、唱歌、舞台剧、电影。多年来我都系拍剧，未知自己最锺意系乜，所以要时间去搵，试到适合嘅就发力做好佢。”

提到近年市道欠佳，娱乐事业不断萎缩，现时外闯会否有点不合时及危机重重？江嘉敏说：“对我嚟讲，之后嘅路系好大挑战，以前喺TVB只要收剧本，专心做好角色就得，但出嚟之后好多嘢要重新学习，好多待人处事都要学。讲真，最初都挣扎过留唔留低，TVB有班好锡自己嘅同事，一定有剧拍，个心会安稳好多，出到嚟就系2025年新人，之后条路好刺激、开心又好玩。好似前排去唔同嘅Casting，我居然有啲怕丑，我就系好想搵番呢啲感觉！”

9年来一直忙个不停，江嘉敏坦言忽略了家人及健康：“一家人相处时间愈来愈少，我想抽时间同佢哋旅行、饮茶，做乜都好，亦想照顾吓自己身体，呢几年出现咗好多小毛病，要花啲时间调理。我亦想做多啲善事，之前忽略咗呢个世界好多嘢，每日返到屋企已经好攰，希望留意多啲周边嘅事，喺能力范围以内帮到多啲有需要嘅人。”今次离巢，家人都十分支持，她坦言17、18岁初入行时，家人的确曾经反对，但她做出成绩后，大家都对她有信心：“屋企人好支持我，好多作品未出，佢哋已经Cap定预告片帮我宣传，我今次都同家人倾咗好耐，珍姐亦好好，除咗倾合约上嘅嘢，亦有同我倾我应该点行，我都好开心，因为呢个决定真系需要好大勇气。”