萧正楠“油腻大叔”成功入屋 吴若希：我畀佢Chok到呕

etin

热播中的无綫新剧《奔跑吧！勇敢的女人们》男女主角萧正楠（Edwin）及吴若希（Jinny）联同剧中演员朱敏瀚、关嘉敏等齐昨日（4日）出席宣传活动，但宣布约满离巢的何远东未有出现。Edwin在剧中被指是“油腻大叔”，而Jinny亦谓他油腻到呕：“佢突破咗我对油腻最新嘅认知，佢拍嗰场英雄救美，我唔知系咪畀佢油腻到，我拍完之后就呕，我好辛苦忍到佢讲完对白就冲入厕所，我嗰场戏唔使呕，但畀佢Chok到呕，我真系好唔舒服。”又多谢剧组迁就抱恙中的她，令她感觉温暖。Edwin则指以为自己好型，但当日她拍到面都青，又赞她很专业：“佢好坚持，病到声都沙都照拍。”谈及饰演Jinny导师及经理人的何远东宣布离巢，无缘和他宣传剧集可感可惜？她说：“唔觉得可惜，如果佢想宣传可以随时返嚟，我同佢第一次合作，开心系佢同我讲呢出系离巢前最后一出剧，佢好感激我哋畀咗咁好回忆佢。”

​Edwin就觉得天下无不散之筵席，只要留在圈中，就有机会再合作，又指对方给予剧组很大力量：“最记得我哋拍剧拍到全部病晒，声都烂晒快要配音，但阿东都撑住，畀力量我哋，佢喺剧中好大分量，同埋我谂佢喺无綫都开心嘅，否则唔会留喺无綫咁耐。”准爸爸Edwin透露忙筹备BB房外，又要为外佣姐姐砌床：“我要等翠如离开咗屋企先可以整嘢。”又指将上育婴班学习为BB冲凉等，并要周围问朋友照顾初生BB的知识，而育有一仔一女的Jinny分享心得谓：“最紧要妈妈同BB一齐，否则妈妈好易抑鬱，我记得囝囝黄疸要照两日灯，我一个人喺病房嘅露台望住个海，个样又残又肿，老公都畀我吓亲，但我一见番BB就冇事。”Edwin则问BB在哪里照灯，Jinny就派定心丸给他：“你唔需要面对呢啲，千祈唔使咁谂。”他则谓船到桥头自然直，自己不太担心。

同场，关嘉敏（Carman）与谷娅溦悉心打扮出席，为另一新剧瘦了20多磅的Carman成为《万千星辉颁奖典礼2024》的“飞跃进步女艺员”大热之一，她直言：“我梗系恨攞奖啦，但陈晓华、陈懿德及陈桢怡全部都系劲敌，所以我入到最后五强都好开心。”问到是否有请扮嘢对象之一《中年好声音2》歌手谭辉智投她一票，她表示：“有，佢都有份角逐“最佳男新人”，仲话自己系最老嘅新人，我都有投佢一票。”对于被赞扮嘢一流，她归功无綫的化妆功劳，及李思捷独具慧眼发掘她有扮嘢潜质，她说：“同李思捷相处唔系好耐，佢就建议我扮嘢。”在旁的谷娅溦也大赞Carman无论扮谭辉智或王菲也相当神似，又羡慕她歌、视双线发展，而她也想拍剧：“拍过一次 之后有监制搵过我，但因撞咗唱歌档期先冇拍，依家都剧倾梗洽，希望今年能够尝试拍剧。”

同场的朱敏瀚被传因要保事业而遭无綫棒打鸳鸯，绯闻女友陈晓华已搬离两人的爱巢，他先多谢大家关心近况，表示传闻不实：“一直同妈妈同住，结婚、同居及分居呢啲传闻好似追剧咁，连妈咪都话新集数出街，自己都唔知下次会写咩嘢，冇同居呢样嘢。（公司系咪想低调处理感情事？）公司冇任何人同我讲过任何嘢，但我相信每个Artist都想Focus喺自己工作上，我拍咗嘅剧嚟紧都会准备出街。（同晓华发展到咩阶段？）畀工作我哋咁就可以畀大家同场一齐问，希望大家都系做嘢为先。（当CP情侣档一齐出席？）唔介意。”