袁伟豪临时缺席录影 陈山聪决定议封肚唔追B

etin

无綫综艺节目《福禄寿训练学院毕业Party感谢祭》昨晚（26号）进行录影，陈山聪、姚子羚、袁伟豪（Ben）及朱晨丽等担任嘉宾，不过Ben临时家有要事而缺席。陈山聪表示因代表新剧《反黑英雄》宣传，加上机会应留给后生仔，所以毋须“扮嘢”，但在家中却经常扮演“牛牛”的角色给体重约17Kg囝囝骑。他又透露囝囝陈霆轩爱扮“蛛蛛侠”及学其甫士，而7月1日就4岁生日，届时会一家人食饭庆祝。问可会送弟弟或妹妹给囝囝做生日礼物，他耍手拧头谓不会：“佢唔会闷，日日过得精彩过我，星期二至六都要学嘢，上英文、数学、画画、学琴，同埋佢最锺意嘅跆拳道，我唔系怪兽家长，每日分配1小时畀佢上堂，唔系日日系玩。”又指囝囝爱他多过妈妈，同时觉得年纪不少，现时又是事业搏杀期，和太太商量后，觉得不如集中火力培育囝囝，一个小朋友就够晒数。

山聪透露刚和子羚及Ben等人自上海宣传完剧集赶返港，对于Ben以“家中有事”为由未能出席录影，被怀疑跟网民指他颜值下跌有关？山聪则为兄弟护航说：“唔会啦，佢演大反派，唔系靓仔形象，我喺剧集《新闻女王》度仲扮过弱智爸爸啦，大家都系专业演出，所以唔使担心佢。”问到Ben家有何事？他说毋须担心：“佢头先心情好好，只系佢屋企发生咗突发事，我哋都系成下午3、4点都返到嚟香港，大家都好赶，我哋做兄弟咪帮佢顶住先。”问Ben是否做爸爸后容易疲惫显老？山聪指Ben在上海时好精神，更扬言要为他平反：“佢同黄宗泽拍《法证先锋6幸存者的救赎》时，又要返嚟同我哋拍《反》，不停喺香港同深圳两边走，我都试过同时拍两出剧，人系会比较攰。”

谈到《新闻女王》将拍续集及电影版，山聪表示有机会也想再和佘诗曼合作，亦证明剧集受欢迎，又《反》在内地反应好而开心。同样自上海宣传完《反》剧赶返港的姚子羚姗姗来迟，她说：“因为我哋经深圳返嚟再坐车，又要整头化妆。（Ben唔嚟？）系呀，我知佢屋企有啲事，唔系大件事，等佢休息吓啦，我帮佢顶，如果攞到礼物，我分啲畀佢啦。”子羚指亮相《福》以为要扮嘢，笑言可扮当年网民恶搞她的“表哥”角色，亦试过扮已故女星周海媚，但最终公司没通知要“扮嘢”：“不过如果要扮，就要畀多小小时间我准备，我冇试过认真去‘扮嘢’，如果要‘扮嘢’就要请教李思捷。”

​在《福》中被安排担任“扮工室助理”的郭珮文（Juliana）则以监狱中的惩教署人员造型现身，谈及“扮嘢”经验，她说喜欢Cosplay但又怕麻烦，以前万圣节曾扮搞笑角色，后来则走性感路线，笑言：“嗰日性感唔畀会人闹，我试过畀Hater闹我系‘鸡’，虽然好难听又难受，但我唔会还击，唔想佢哋觉得刺激到我。”问可想节目再添食？她即时扁嘴，笑言想作新尝试。谈到同样拥有“最强Body”的参赛者丁雨然在社交网宣布退选，她说：“呢个系佢哋自己嘅决定要尊重，如果压力承受唔到，退选开心啲咪退选啰。（你参选时有冇压力大到想退选？）咁又冇。（嗰时你成日天然呆唔出声喎？）嗰时系同大家未熟，怕丑啫，我觉得参选时唔好畀咁大压力自己，无论输定赢要享受经历，我觉得减压方法系瞓足觉，因为参选时好忙，我天然呆系性格问题。”