|
天王郭富城(城城)首次在港参与主演电影《临时劫案》谢票活动,昨午(2日)会合片中拍档张松枝及王颂茵等到访戏院,随即令全场尖叫欢呼,又以戏中金句“多谢”、“啱数”等与粉丝互动,期间有女影迷高举写着“7岁粉丝求签名”纸牌,成功吸引城城注意,邀小妹妹站出来问问题,对方笑言:“点解你咁靓仔嘅?”城城慈父上身答道:“我唔知点答你喎,都唔觉得自己靓仔,普通啦,你想点啫?”为小妹妹及其妈妈签名后,小妹妹主动向城城献吻,令他冧爆!据悉,《临》片至昨日票房冲向1,800万港元,教台前幕后振奋不已。城城受访时表示:“首先要讲多谢,真系啱晒数。其实一直好想出嚟谢票,但我离开咗香港两个礼拜做演唱会,啱啱返嚟电影公司就问我,我梗系话好啦。
之前喺广州做完演唱会就谢咗,完过年就生番晒嘞,去番应该有嘅状态,所以我都想见吓啲影迷,答谢佢哋对呢部电影嘅喜爱。(口碑咁好好开心?)开心,台前幕后都畀咗好多心机嘛。(口碑系意料之中?)多谢!(因为满意票房?)投资者梗系想有比较好嘅票房,不过如果有比较好嘅票房,佢哋就会有信心再去开戏,依家香港电影需要多啲新嘢,大家努力去做多啲啦。”城城笑言感激团队今次如此“大胆”:“搵我去做一个悍匪喎,仲要有更多黑色幽默元素,但好多朋友同我讲,话我唔系喜剧之王,呢样交番畀周星驰,我只系一个悲剧之王,今次系近10年自己比较少有嘅角色,有时啲嘢要撞出嚟,同埋戏里面咁丑样我都好大牺牲㗎。”当问到两名囡囡有冇欣赏其演出,他坦言:“佢哋咁细个冇睇啦,不过我有朋友送番啲剧照畀我,其中一张系我中枪嘅,佢哋好感情丰富,担心到喊咗出嚟,好伤心。”
|
|