|
郑嘉颖与网球运动员王康杰在大坑出席网球活动。嘉颖出名喜欢网球,有意培养小朋友打波:“谂住大仔5岁就带佢去学打波,当然搵人教佢,希望佢好似王康杰咁为港争光,有冇天分就未知,希望有,觉得小朋友应该要全方位发展。”嘉颖最近与马国明传出不和被指“嘥时间论”引起风波?他回应表示:“估唔到一个回应,去唔去到马明婚礼,会有咁多唔同版本出咗嚟,同马明讲声唔好意思,喺佢最忙嘅时候,要出嚟帮小弟澄清、解画,增添咗佢嘅麻烦,最唔想麻烦到人。点解咁大件,我都有睇返片,所谓嘅时间论呢,我系讲有三个小朋友之后,时间好缺乏、好紧,需要睇点样分配,如果要出外埠参加婚礼系有难度,就系咁讲,你话嘥(指嘥时间)就冇讲过。(态度问题引起误会?)如果识我耐嘅人都知,我不嬲都有呢个问题,呢个系一个问题,改善中,出世到现在都系咁,有啲朋友都话你可以喺呢行生存到30年都系奇迹,系喎我咁嘅性格,都可以喺呢行30年都几奇迹,但系我都会去改善。”
​问到是否与马国明有不和?他表示:“我哋两兄弟之前已经拆掂咗,马明好体谅我,知道我要凑小朋友话冇问题,婚礼之后就同佢食餐饭,到食饭再亲手送份礼畀佢,以为两兄弟搞掂咗,嗰日受访就唔想讲咁多嘢讲,可能讲得太唔清楚,搞到传不和。”讲到期间太太陈凯琳上载非洲旅行相被指火上加油,嘉颖说:“呢个我真系唔好意思,最唔好意思系我坚持自己性格系一件事,但唔好牵涉到其他人,令到其他人增添麻烦,可能我讲嘢太简短、唔锺意解释、唔够详尽,呢样会改善。今次令马明、太太、或者阿佘都增添不必要麻烦,自我还自我,但唔想影响其他人。”讲到他与佘诗曼的绯闻被旧事重提,他说:“当年嘅嘢就唔回应,对阿佘好唔好意思,牵涉到佢,可能我嘅表达方式有问题,会改善嘅。”对于表弟王贤志暗指他是“双面人”,嘉颖则说:“亲戚、屋企人嘅嘢就唔讲,如果我咁叻做到双面人,依家就唔使喺度解画,我想圆滑都圆滑唔到,我尽力啦。(搵王贤志倾吓?)唔使啦,我识咗佢一世,唔解释喇。”
|
|