|
准人夫马国明昨日(26日)单拖出席商场活动,但不时冧爆提起未婚妻汤洛雯(靓汤),除透露靓汤最想睇北极光外,玩游戏摸到百洁布时,他自爆:“我喺屋企负责洗碗,哎吔,爆咗出嚟添!”之后有粉丝戴住靓汤面具现身,被大会抽结婚水,他不但不介意,还望住伪女友说:“乜你嚟咗嘅?”司仪问:“有咩同靓汤讲?”马国明说:“你好靓!”之后和“靓汤”齐做心心手势,sweet爆全场。​他接受访问时指靓汤本来陪行,曾打算做司机送他到商场,不过得知大会安排车位给他泊车才缩沙。问到是否想和靓汤齐出席活动,他恨到出口谓:“想!之前做过一次金饰活动,希望之后可以一齐做多啲活动,商演同拍广告!(想夫妻档搵钱?)梗系啦,等钱使,结婚开支好大,好多嘢都要计钱。不过系开心钱,唔好悭,各方面如酒店都贵,会请6至70位双方嘅宾客,(你全包宾客使钱?)呢啲唔好讲啦,唔知几多钱,盘数系靓汤度。”
​问婚期是圣诞前或圣诞后,他口密表示要问靓汤,因已被禁嘴,问是否怕老婆,他则说:“系尊重,不过可以讲系我会跳舞,呢个系人生最惊,因为差到吓死人,佢跳得好好,我觉得系玩新郎啰,我会搵老师学,跟住自己再练,不过就算跳得差,佢都会嫁畀我。”他又透露拍完再拍几日新剧《飞常日志》,紧接为《新闻女王》宣传后就离港结婚,虽然有部分宣传活动暂未能参与,但相信只是离开几日,对团队影响不大。​他又谈及他在新剧《新闻女王》中,被网友指其气场完输给佘诗曼,他觉得有此剧评就是剧集成功,他谓:“咁阿佘嘅气场一向劲,同埋个剧叫《新闻女王》,佢气场劲先啱,其实我同邓智坚好似太监咁,香港同内地收视都高,所以阿佘冇得输,不过好似踢波咁,场场都7比0,6比0,或者最尾畀我偷到鸡入到波啦。”问到他和何依婷的后楼梯激咀戏出街后,靓汤可有呷醋,他则说:“佢冇嘢喎,其实阿佘同谭俊彦,何广沛嗰啲咪仲激。”
|
|