黎诺懿甘屈身餐厅做打杂 自知性格要强拍剧要做男一

etin

艺人黎诺懿由幕前走到幕后，近年在饮食界大展拳脚，兼且愈做愈瓣数多，只是做生意有一大原则，就是宁独资不合伙，笑言：“要死都要死喺自己手上”，亦因爱做主性格，他不讳言剧集配角一律免问，不介意被指寸，只最怕被人睇低。

黎诺懿由电视剧当男一及主持，发展到转战幕后任节目监制，现时更兼任饮食集圑的“创意总监”，日前他现身任“打杂”的餐厅接受专访，问到是否改口叫有份投资集圑的龚嘉欣做“老板娘”，他就话：“咁又唔使，佢系负责蛋糕嗰部分，我就系主理集圑嘅创意总监，好似唔同范畴喎。”见他和现场的餐厅员工打成一片，完全没有“高层”架子，他又谓：“除咗清洁外，我乜都要做㗎，连餐厅出面嗰条LED隧道都系我搞嘅。”又透露为拓展生意额，打算优化餐厅的户外场地改为酒吧，希望开夜市吸客。

诺懿身兼多职，觉得最辛苦的工作是做爸爸，谦说年届43岁，体力已大不如前：“老实讲，我全身冇一忽肌肉系唔痛嘅，大仔重到好似旧石头咁都要照抱，细仔就要玩摩天轮，举高佢凌空飞，虽然我唔系老，但如果我仲喺30几岁会好啲啰。”不过他有信心10几年后就回复自由身：“因为我都系仔，当年我10几岁时都走咗去，唔再黐阿爸阿妈，所以依家要好好享受个仔肯黐自己嘅日子。”更预告自己的退休生活，或者和太太在海边开民宿过日辰。

问到厨艺了得的他为何不计划开私家房，他就话性格问题，指出钱出力请朋友食饭绝冇问题，但朋友间讲钱多数失感情，他直言：“同朋友夹钱就会有好多拗撬同计数，所以做生意我一定独资，要死就要死喺自己手上。”道理放在拍剧上也一样，如邀他任男二，他必定推辞：“我又唔系视帝马国明，亦都唔系梁朝伟先生嗰啲攞咗国际奖项被肯定咗时，人哋会觉得跌番落去做男二，加上我又减产，啲人可能会觉得我愈捞愈唔掂，咁不如唔做。”