陈淑兰嬲方中信呃自己 直认曾掴莫可欣：唔止一巴

etin

陈淑兰（兰子）近日现身伍仲衡与周国丰的直播节目，大谈感情生活、情绪病与自残经历、与张国荣、周星驰的合作点滴等，足足3个钟大爆料！​兰子直言已经5年冇拍拖，但好享受目前生活，每两星期就去一次旅行，觉得自己根本唔适合结婚，屋企亦有十只小动物陪自己，不愁寂寞。被问到拍拖次数，佢指十只手指数得晒，初恋系做模特儿时嘅超级有米男友，同大部分前度都能做得番朋友，甚至连祈文杰嘅现任女友都系由佢撮合：“我唔会搞番我以前啲ex，我同你分就分！”当问到最爱系边个，佢指：“当我同嗰个人一齐，我当时系最爱佢，竭尽所能去爱，但过咗就冇嘢、感觉冇咗。”

有观众问旧爱方中信恶不恶，兰子回应：“恶唔恶睇吓你有冇得罪佢啰，唔得罪佢应该唔会恶嘅。”当时有传系方中信现任太太莫可欣介入二人感情，令兰子同方中信四年情断，更有传佢曾怒掴莫可欣，伍仲衡食花生问：“有人话你掴过人一巴喎，系咩事呢？”兰子直认不讳：“唔止一巴，讲完就算喇，但我至少答咗啦，系咪？”周国丰想知道详情，兰子就表示：“我好嬲系嬲个男人，嬲个男人呃我。”

她曾被指为情自杀，兰子即特意澄清自己当年割脉，系因为1991年父亲过身后有情绪病，曾狂燥、抑鬱、轻微社交恐惧、对任何事都提唔起兴趣等：“我好惊尖嘢、好惊血，嗰时对好多嘢冇感觉，只要揸住好尖嘅嘢，见到血，我Feel到原来唔系灵魂飘紧，我系活着。跟住我开始歇斯底里，好似撞鬼，唔知发生咩事就会‘呀！’好似啲人临死，灵魂出窍，见到姑娘帮我打镇静剂嘅画面咁。”
兰子于代表作《家有囍事》中，表现令人难忘，更完美化身“金丝雀”不过兰子就称：“大家唔好叫我碌床，我依家五十肩，碌完我谂直接送去医院。”又透露曾因“怕红”而拒绝接拍《家有囍事》：“高志森搵我去半岛酒店倾，嗰时我Daddy过身冇耐，我个人忽忽地，我同紧一个人拍拖，我好惊自己会红，觉得会影响我哋感情。去到半岛酒店，高志森话呢套戏有毛舜筠、哥哥（张国荣）、张曼玉（Maggie）……我问我拍完呢套戏会唔会红，佢话梗系会红啦，我话咁我唔拍喇。当时我好惊人群、好惊对人，惊出嚟见到咁多人，后尾高志森叫我做，话好难得有机会，我第一日开工感觉好似妈咪第一次带小朋友返幼稚园。”幸好哥哥、张曼玉等全无架子、好体贴，令佢慢慢放松。

兰子重提抽胃腩脂肪、打Botox消灭Pizza面等，但否认贪靓：“我咬肌比较大，打Botox系令肌肉瞓觉，嚿肌肉会扁，我依家冇乜效，两个月唔够就再打。讲到曾因医学美容遇意外，但并唔影响兰子追求医美嘅决心：“我出事因为遇到坏人，嗰时话Botox要医生打，嗰条友够胆扮教授，小喇叭！佢帮我打颈纹，又唔系医生，乱咁打，啲神经线咪唔知去咗边，跟住我开始有吞咽问题，平时会自动分泌口水，但打完口水唔够，吞唔到嘢。”她更一度因口水无法分泌，无法吞咽而噎到，差啲窒息，主持问佢为何仲敢打Botox，佢就答：“佢唔系医生嘛！佢死黄绿！专业梗系冇事啦应该，我都抽过胃腩。”