汤洛雯为爱减肥成功 颜值身材重回巅峰

etin

艺人汤洛雯与视帝马国明婚礼举行在即，2人早前更飞去法国影婚纱相兼旅行，相当甜蜜！自今年初宣布求婚后，靓汤就开始为婚礼而积极做运动Keep Fit，誓要做个靓靓新娘，以最佳状态出嫁。近日，佢喺社交网晒出多张“未婚夫视角”嘅旅行靓相，相中佢穿着低胸吊带连衣裙，一展迷人好身材，面露甜蜜笑容嘅佢，幸福气氛真系隔住个Mon都感受得到。
据悉佢依家已经成功减下20磅，重回当年参选港姐嘅状态。不过有网民就笑指佢冇事业心，之前因工作需要，要佢减肥但就失败收场，依家为咗结婚就好快减肥成功。皆因佢当年接替黄心颖拍摄《法证先锋IV》时，被要求喺一个月内减下20磅，结果减肥失败，更被观众嘲笑佢条腰有肥肉。之后喺剧集《隐门》，依然减肥失败嘅佢，更被网民嘲笑喺剧中，外貌身材大走样，十足师奶咁款。虽然当时佢有解释自己因为身体不适，需要食药，令身材肿胀，样都好残，不过大部分网民似乎并不买帐。