余香凝7.7磅囝囝出世 最想阿仔饮多啲奶奶

etin

艺人余香凝（Jennifer）与圈外富贵老公结婚后，搬入半亿豪宅做少奶奶，二人育有宝贝女Clare，依家家庭成员再添一人，昨日（20日）宣布囝囝都出世喇！社交平台宣布喜讯，B仔顺利出世，重7.7磅，并分享了一张一家四口手叠手的“全家福”，相当温馨，再为人母的Jennifer开心写道：“欢迎嚟到我哋呢个家，我哋每一位都好爱你，家姐仔觉得你好靓，以后佢会成日唱歌畀你听，你成日都会听到let it go同a whole new world 。”并hashtag #916，似乎BB系9月16日出世。
Jennifer兴奋表示今次生产过程轻松，囝囝更令佢喜出望外：“好开心BB已经出咗世喇，成个过程好顺利、好轻松，第二胎自己都冇咁紧张，所以做手术嗰时，我同先生、两位医生都一路倾偈，咁就迎接咗我BB出世喇！同埋佢有7磅7，自己都估唔到。上胎我系谷到自己好肥好肥，系食到自己呕，今次顺其自然反而BB就好大，同埋佢好多头发，好意想不到。但最紧要都系健健康康，好开心佢好配合妈咪、好乖，喺医院已经成功上咗奶，对喂母乳妈妈嚟讲系非常之感动。”
​佢续大爆老公今次喊得比阿女出世更厉害，因疫情已过，囝囝出世后老公就可以抱BB，因而令平时收收埋埋嘅佢情绪爆发：“一抱到埋身，佢对眼开始红、想喊，我即刻叫护士帮我拍片影低佢，我见到呢个画面都好感动。”佢指当BB出世一刻，产房内刚好播住谢安琪嘅《成婚破浪》，令成件事好浪漫！到BB返屋企，爱女Clare亦对细佬宠爱有加，大赞细佬好靓，多次唱歌畀细佬听，亦未有表现妒忌，令Jennifer感安慰。