又反胃又丧呕 江若琳宣布大肚：等咗足足4年

etin

女星江若琳同老公萧唯展刚过35岁生日，二人结婚4年以嚟，肚皮都未有声气，估唔到喺圣诞节嚟临之前、结婚4周年嘅日子，宣布怀孕消息：“今日系我哋两口子结婚4周年啦今年我哋得到咗一份渴望好耐而又弥足珍贵既圣诞同结婚周年礼物我俩等待你嘅出现足足4年啦，一直都以为生BB系一件理所当然，好容易嘅事，但呢几年间经历过不停嘅尝试又不停咁失败，连身边嘅朋友都比我哋着急，次次都关心我哋几时生得出我哋都会感慨，生仔原来好难，但到最后我们已经选择咗半放弃，经常都话，就算世界只系得我哋两个，我哋都会快乐地走到白头，不过人生就系一个充满惊喜嘅旅程，每当你好用力想要得到一样嘢嘅时候，往往总系事与愿违，但当你选择放下放轻松时，圣诞老人就会系一个最美好嘅时间点将你最想要嘅礼物送畀你！”佢仲自爆呢几个月佢玩“失踪”，系因为佢成个人都“疲累、反胃、呕吐”，怀孕反应大，又自嘲想像唔到佢做人阿妈系点，话都系会论尽又骑呢，不过就未有透露BB性别！

而江若琳接受访问就表示：“当我知道嘅时候，有啲唔敢相信，因为我哋不断喺失败中徘徊，每一次都系失望，所以今次见到系两条线，我都有一刻怀疑自己系咪中咗Covid，哈哈，完全唔敢相信。然后我个脑系一片空白，要拎出去问我老公觉得系点，要一齐Load一Load呢个画面。之后我老公第一个反应系眼湿湿嘅、眼有泪光，然后不停同自己讲要冷静，但其实我知道佢相当唔冷静。同埋，预产期喺下年年中，咁其实都几唔舒服嘅，所以都几感慨原来做妈妈真系好伟大，呢几个月不断咁反胃、呕，又食唔到嘢，但系都系好感恩同好开心嘅！”

丈夫萧唯展则表示：“结婚4周年了，身体健康夫妻和睦冇乜闹交，多谢老婆。依家我嘅心情就好似美斯攞咗世界杯咁，我哋四年前既今日结婚，我望住好多小朋友喺我嘅婚礼入面跑来跑去，好可爱，好希望快D有一个我哋嘅BB。点知努力咗四年，中间试过好多次失望，医生话虽然我靓仔，但精子唔合格，好难有BB。但系我习惯左只要有梦想，凡事可成真嘅理念。首先检讨一下自己，重新建立一个健康嘅自己，戒咗烟，不停跑步做运动，食健康啲。终于四年后嘅今日，我哋成功攞到世界杯喇。多谢老婆，多谢每一位提供过良方畀我哋嘅朋友。”