做监制一脚踢！林家栋：可能真系断六亲

etin

“香港国际影视展（线上版）”昨日（14日）揭幕，电影人林家栋接受网上访问，大谈香港电影。讲到近10年间由演员身兼监制及出品人，他坦言因有感电影题材愈来愈单一化，故开始做监制，希望发掘多些不同题材，例如《杀出个黄昏》这类适合长者的电影，他说：“呢个故事2014年已经有，用咗好多时间去磨，到2018年去申请基金唔成功，我谂如果依家唔搞呢部戏，到时可能已冇魄力，演员状态亦不似从前，所以我自掏腰包去做，希望满足年纪大观众，同埋睇吓除咗主流题材外，仲有冇其他可能性，所以投资呢部电影。”而他从事监制时更是事事亲力亲为：“我要推销畀观众，所以监制要有参与，先系合格监制。”他认为要让观众建立对香港电影的信任最为重要。

家栋向来喜欢跟新导演合作，他称作为电影人要全程投入：“可能真系断六亲，啲人话你同林家栋做嘢，佢咬住你唔放，我话我系，唔可以蒙混过关，我不停踢桥，连上床瞓觉都会谂，要审视点做好呢件事，点开发自己、谂多啲、投入多啲。”讲到不少年轻创作人也很自负，要如何获得他们信任，他坦言：“我同佢哋讲有自信系啱，但唔好多，你唔系顾自己感受，要顾观众感受，佢唔睇你仲难受，投资方都系冒险，信任由创作开始，呢句对白潜台词系咩，我逐句去芜存菁，令佢心服口服，我会演畀佢睇，活体去教佢。（对新演员有咩忠告？）真系爱电影，你每日要感受生活，唔好心急。（有咩说话同香港电影人讲？）再出发，依家酝酿一个改变唔系咁单一题材，要新旧两代共融。”