陈敏之生日开工！冯盈盈等过年同笋盘拍拖？

etin

艺人陈敏之与冯盈盈昨日（17日）为无綫真人竞技综艺骚《识货2》开工，适逢敏之43岁正日生日，制作组细心送上蛋糕，有份参与节目的艺人也齐齐唱生日歌，凼得寿星女开心非常。​虽然要工作过生日，但敏之扬言不介意，更指将连续开工3日，绝对是好兆头，寄望日日有工开，问到老公及儿子有何表示？她说：“呢个星期不停去妈咪、奶奶屋企食饭，庆祝咗好多次，林盛斌仲送埋个海鲜盘菜畀我打边炉，个仔画咗幅好靓嘅画畀我，老公呢排钻研紧香薰，佢送咗个好靓嘅香薰摆设畀我。（佢系咪想做呢方面生意？）我觉得佢会，仲叫我一齐去读有关课程，之后研究吓点带货。”

搵林盛斌介绍笋盘

而早前踩入NFT（非同质化代币）市场的盈盈，则表示生意不错：“我都仲有啲存货嘅，主要系艺术品同水晶手链，货品有平有贵，平到几千蚊都有。（呢排冇拍剧，想主攻做生意？）我努力学习中，之前去学中医食疗法，增值吓自己，对自己做直播都有用。”问到何时再入剧组？盈盈表示要等公司安排，敏之闻言即打蛇随棍上：“咁有冇拍拖？”盈盈说笑指要等多阵，记者提议她搵林盛斌介绍笋盘，盈盈说：“有搵，佢话送个新年礼盒畀我啰！”