何依婷信错人 爆被前度呃：以为可以付托终生！

etin

艺人何依婷2017年参选港姐赢得亚军后入行，入行4年的她机会不断，由节目主持、大骚司仪，以及剧集中也能见她的身影，最近于剧集《十月初五的月光》首尝女一滋味，演技获外界一致好评，但她并未因此自满，指为追求事业仍需不停学习进步，扬言：“谈婚论嫁迟啲先讲！”

首尝做女一，她指压力不算大：“全副心机放喺点去演，冇时间去谂呢方面，只系担心做得唔好，因为我做事一向尽全力，令自己唔会后悔。（满唔满意自己表现？）开心嘅，因为好似自己个Baby，终于出世，作为新人仲有好多嘢去学习进步，唔会因为一套剧自满。”

坚持做好每件事

何依婷坦言自己是个硬颈的人，会坚持做好每件事：“未成功唔好灰心，总有一日会得，不过有时都令到屋企人担心。（例如？）拣男友啰，哈哈！当年读大学，妈咪好唔锺意个男仔，但我觉得佢几好，所以坚持一齐，因为我系一个好易感动同好易呃嘅人，男仔对我好少少，我就好感动，觉得可以付托终生，有人会问我：‘你唔系想嫁畀佢吓话？’。”

​她笑言现在人成熟了，甜言蜜语攻势已无效，并透露择偶条件：“性格好紧要，乐观、有风度同幽默、有男子气概同不拘小节，唔好郁啲发脾气闹我。（会唔会好难搵？）随缘啦！我又唔系急住结婚，呢几年好重要，想等事业上足够成熟先。（女一都未系？攞埋视后先？）又唔系，想试吓可以去到几远，Keep住拍，有自己代表作先，想畀人觉得何依婷系有实力，唔系嚟玩，唔系只卖样，我相信只要努力，大家会感受到。”她自言很欣赏陈法拉，会以对方为目标：“佢好叻好坚持，喺TVB慢慢开始演起，再去外国进修，然后拍咗部好电影，佢一定系付出咗好多我哋唔知嘅努力，好欣赏佢嘅热诚同勇气。”