时刻走喺潮流尖端嘅“网络女神”倪晨曦(Elva),日前拍片分享近期最兴嘅“瘦身餐”,留言话一见到呢个“餐单”就觉得好吸引,试完仲觉得好Work,所以就要同大家开心Share﹗最后千叮万嘱大家一定要试吓︰“相信我﹗必定回味无穷﹗#可能系世界上最有效嘅减肥餐单”究竟系咩餐单令Elva咁一试难忘?
见Elva着到靓一靓咁,先拎起个热水壶倒热水渌嘢,但当镜头一转,见到个煲入面系乜都冇﹗但女神依然好Enjoy咁扮煮紧嘢食,原来佢所指嘅最有效嘅减肥餐就系食空气﹗虽然呢条恶搞片唔够几十秒就被揭穿真相,不过Elva一于少理,继续演好呢场戏,见佢之后仲扮晒嘢拎起把刀做出薄切、切碎食材嘅动作,再双手扮打蛋兼发蛋,最后全部落煲加埋调味料煮熟,不费吹灰之力咁就搞点﹗煮完当然就唔少得有试食嘅环节,Elva仲一口气“食晒”落肚,露出一副劲滋味嘅样,由呢条啱啱好1分钟嘅片就睇到女神演技十足, 睇嚟佢相当有潜质拍戏﹗
除咗吸引到大批Fans留言话“好好笑”、“睇落都觉得好好味”、“呢个餐单一定减到肥”之外,仲引到日前落太多水、蒸水蛋初体验Fail嘅朱千雪留言抵死自嘲︰“我都试过,不过唔Work,可能落得太多水﹗”Elva回覆笑话︰“叫你老公试下整,可能更加好味﹗”​
|