舞台剧爆满照蚀7位数 马浚伟但求人人有工开

etin

艺人马浚伟近年不停学习，先后完成北京大学光华管理学院硕士学位及香港浸会大学为期2年的中医课程。而他亦致力发展自家“品牌”，除了咖啡，更创立了艺术教育中心，他之后亦会推出唱碟、继续拍摄电视节目、电影等。虽然一人身兼多职，但这位“CEO”忙得不亦乐乎，就连3位“阿妹”陈法拉、锺嘉欣及杨茜尧都先后问他为何做得这么辛苦，法拉更经常叫他去玩，但这位“CEO”却表示不辛苦，每一日都如玩乐中。他谓：“我系一个锺意多元化嘅人，每一日我都系玩紧，我根本当每一日都系最后一日，我好肯定，依家做几多嘢，呢一刻就算我拥有几多都好，都冇用！因为好多嘢系带唔走，我谂得好通。（咁灰？） 一啲都唔灰，每日都充满希望，我每日都要做到最好，第二日擘开眼你就觉得好过瘾，寻日积落嘅嘢今日就有得着，不过我嘅计划好长远，3至5年内计划我已经有晒，我唔介意突然间无晒所有嘢，我只会介意我有冇做好每一日。”

似做剧组班长

马浚伟是一个有要求、相当有规律的人，每次约人都会早到，开工永远是最早入录影厂的一个：“我约人会早半小时到，甚至会早45分钟，我想自己沉淀吓，咁样反而仲轻松。（以前啲人拍剧迟到你点？）我忟㗎！我永远都早到，永远唔会迟到，提早入厂。（有冇人迟到畀你闹过？）早期自己脾气未咁好，你成日迟到我真系开声闹，梗系有试过！边个就唔好讲喇！我知对方会唔开心，但你影响到人嘛！我冇办法唔闹你！点会次次通告都迟半个钟至45分钟？有几个相熟监制如梅小青、梁材远（材叔）、徐遇安、刘家豪，佢哋永远对我零担心，材叔成人叫我‘小队长’，佢话‘靠你喇！成个戏气氛靠你！啲演员睇你头呀！’而小青姐就会话：‘大家好听你讲㗎！你要树立一个榜样。’搞到我成日好似做班长咁。”

舞台剧蚀硬7位数

原本上年9月公演、与黎瑞恩合演的舞台剧《男人40 CEO》，由于疫情关系，现决定今年6月公演，日前预售反应热烈，马浚伟于此剧中身兼监制、编剧、导演、演员多职，不过由于之前延期，宣传费各样已令他损失6位数字，现时虽然开10场，惟预售时为配合防疫措施，只卖了一半座位，他不讳言就算所有场次爆满，都要蚀硬7位数字，寄望迟些可全场开放。问为何不迟些再做，他坦言：“唔得喇！个个演员要食饭，都50、60人，我唔可以再Hold住人哋啲期，大家一定要开工。”

舞台剧饰演“口贱CEO”

向来做惯正经角色的他，于舞台剧饰演“口贱CEO”，“我唔会讲粗口，但会有啲谐音嘅嘢，都几贱格㗎！就系因为佢太衰，表面上所有下属都对佢阿謏奉承，但内里憎到佢死，而黎瑞恩就系默默支持我嘅人，佢喺我眼中好蠢。（现实生活系咪好憎蠢人？）又唔可以咁讲，如果真系蠢嘅，可以做朋友，但唔好一齐做嘢，我真系有啲朋友系咁，同一样嘢错1次可以，但唔可以错第3次，3次就真系冇得倾，再唔系我自己走啰！哈哈！”

自认系宅男

平时马浚伟喜欢看电影、听音乐，打羽毛球是他最大的嗜好，说到他好像很少去旅行时，他谓：“我真系唔热衷去旅行，我唔系好锺意，我锺意创作、睇戏、听音乐，全屋最多嘅系喇叭。（咁你都几宅？）几宅㗎！我锺意狗仔、动物，平时会行吓文具铺、电器铺。（咁你悭唔少喎！）系㗎！特别依家出咗智能手表，我已经冇买表好耐，最后买嘅系6年前。（咁生活上花费最多系啲乜？）都系公司Project上，每个人唔同，好多人觉得周围食嘢、去玩系享受，但我享受不停喺工作攞满足感，一啲由零开始到有成果嘅嘢，好似由构思艺术学校到招生、开学，嗰种满足感系好大。”

有指之后马浚伟会正式返无綫担任训练学校“校长”，说到此时，他只谓：“我哋系初步倾过。（分到时间做？）其实4月会有好多嘢，等TVB公布啦！”