老公被指虚拟人物 杨思琦反驳：边谂到咁多嘢

etin

艺人杨思琦与罗霖接受邵氏兄弟节目《Master's Talk师父有请》访问，主持人麦玲玲提到杨思琦当年在幕前发展不错，却突然未婚怀孕，诞下女儿，令娱乐圈震惊，她说：“生小朋友系我打算，不过之后发生嘅事，系我同对方（前男友吴帅）有问题，冇再喺埋一齐，唔系大家想像咁，件事好简单，我唔会觉得几震撼，当时唔敢讲，面对传媒系逃避心态，怕讲多错多。”她表示对方没有经济上支援女儿的生活费，她认为自己负担到就问都没有问对方。

被追访心情感抑鬱

分手后，她继续完成跟无綫的合约，不过心情上有点抑鬱：“当时被追访，啲报道字眼又好唔开心，当时都担心前路茫茫，因为生咗小朋友角色有限制，不过演员唔需要个个都青春少艾，我唔惊人哋点睇，最紧要我有饭食。”她表示曾经试过返内地工作至凌晨时分才返港，妈妈才告知女儿有份功课未完成，她形容是晴天霹雳，于是火速为她完成后才去休息：“个女见到妈咪工作辛苦，有次病咗发烧瞓喺床，佢喺床边问候我，话好担心我，仲揽一揽我，我个心已经融化咗。”而育有3子的罗霖称儿子始终没女儿窝心，但二仔就读心理学之后，有次返港放假对她说：“呢几年辛苦你喇，你所做嘅嘢，我都睇到呀！”罗霖一边讲一边哽咽，没想到坐在身旁的思琦都禁不落泪。

“依家生活好开心”

至于当时分手后，会否期待第二春？杨思琦说：“头几年真系唔会谂，唔会有心情出去约会，不过当时个女有话想要弟弟。（女儿会否问起爸爸？）佢冇问，但佢话过想要个爸爸，所以依家好开心，亦叫现任老公做爸爸，不断叫爸爸，佢恨咗好耐。”至于现任丈夫身份一直成谜，她称对方是圈外人，不曝光亦是尊重对方的决定：“我入行都廿年，由细睇到我大嘅传媒，有咩都可以讲，不过佢话唔想讲我咪配合。（呢个世界上唔多人知？）系呀，网上话虚拟老公，话我自己一人分饰几角编出嚟，咩大话冚大话，我觉得好搞笑，如果真系大话，我会好辛苦啰，我点可以谂到咁多嘢。（怪老公？）唔会怪佢，每个人想法都唔同，大家系要适应同要企喺佢角度谂，总之依家生活好开心。”

罗霖强忍多年才离婚

而麦玲玲就形容罗霖当年是嫁入豪门，可惜外界不太看好，罗霖说：“坊间好多朋友都有打赌，睇吓我同佢（前夫）当时系结婚定分手。我都冇谂过同佢结婚，我18岁就做空姐，都少少见过吓世面，对佢初初冇乜感觉，佢唔系我锺意嘅类型，当初佢话追我，我系好惊，因为当时啲报道话佢系公子，又同其他娱乐艺人一齐，所以初初都系避开佢，不过后来一大班朋友玩，就成日见到佢。”

她认为坚强凑大3个儿子，是为势所逼：“离婚唔系一朝一夕，我忍咗好多年，都希望啲仔大啲先，直至佢超越咗我底线，所以就离婚。（赡养费？）离婚一刻赡养费系零，我负责小朋友生活费，前夫负责小朋友教育费，点知过半年佢同我打官司，想分我一半钱，学费佢都只想畀部分，打官司真系好心力交瘁，我一个女人点算好呢？幸好妈咪话有饭食饭、有粥食粥，叫我返去。”问到为何有勇气独自带3个孩子？她解释起初只是带细仔离家，不过大仔及二仔主动带行李去找她，变相负担愈来愈大：“离婚后我冇谂过复出，因为年纪好大，只系谂住同朋友夹份做生意，不过离婚报道之后，有广告同工作搵我，于是双线发展。”

想搵番个伴

罗霖笑言离婚初期是最多人追求，可惜照顾3个小朋友太大压力，好担心感情生活会令她崩溃，现时会期待找个伴：“照顾头家好辛苦，想有个伴，啲仔将来有家庭唔会理我，我做好心理准备，对象唔使系笋盘，最紧要大家沟通到，佢心地好，唔使靓仔都可以。”