陈家乐“老婆仔”自爆见过连诗雅 惨被卫诗雅灭声

etin

由英皇艺人陈家乐、卫诗雅（Michelle）主演的电影《不日成婚》昨日举行首映礼，同剧演员朱栢康、谈善言、杨偲泳、岑珈其齐齐大晒冷，更获英皇集团老板杨受成伉俪、吴浩康、曾乐彤、许靖韵及万希泉创办人沈慧林等现身支持。

Michelle带同有份客串的5岁姪女瑆瑆，孖家乐一齐受访，男方自爆已向瑆瑆求婚，得戚笑说：“佢系我老婆仔。”继而跪低问：“你老公系边个？”瑆瑆萌爆秒答：“我老公系陈家乐。”搞到家乐劲冧！Michelle再爆姪女之所以肯应承客串都是因为有“老公”：“一开始佢话唔拍，但一知道有家乐就嚟，但其实喺戏入面佢哋冇对手戏，所以佢都好失望！”家乐即自首：“本身我谂住探佢班嘅，但嗰日我身体唔舒服冇去。”

然后Michelle笑话随住姪女长大，对家乐的爱意有减低：“佢之前成日周围同人讲家乐系佢老公，又话大个要做演员，因为要同老公拍戏，但佢最近嫌家乐老，其实佢有新对象，就系佢嘅同学仔。”问到家乐会否伤心？他坦言有少少：“不过佢依然嗌我做老公，都好Sweet！”打趣问他有“老婆仔”，就不怕女友连诗雅呷醋？他瞬间面红兼想扯开话题，记者转目标问瑆瑆可得悉“老公”有女朋友？瑆瑆童言无忌说有，又点头示意有见过，即被姑妈用双手掩嘴，场面爆笑！之后Michelle帮手转移话题，感谢公司科水拍这部电影。

讲到电影原于贺岁档期上映，惟受疫情关系延期至复活节档期，2人表示不会失望，因为刚收到好消息指政府宣布4月开始放宽戏院入座率至7成半，变相将于4月1日上映的《不》成首部受惠电影：“多啲人睇热闹啲，到时会丧谢票，同公司讲唔使放假，希望票房有好成绩。”

另外，问到Michelle之后会否继续让姪女拍戏？她表示暂时都唔想：“佢系第一次拍戏，有封利是做酬劳，佢好锺意做戏，有日拍到好夜怕佢眼瞓叫佢走先，但佢喊住话唔想收工，其实今次纯粹想畀佢试吓、玩吓，麻麻哋佢入行，希望佢读好书先，怕佢变得老积，童真好宝贵，到佢大个先畀佢自己拣行咩路。”最后记者乘机再追问瑆瑆觉得连诗雅靓唔靓？这次吓得家乐出手掩嘴，同时Michelle紧急抱走瑆瑆，3人落荒而逃！