疫情收入冇减！孙慧雪胜在够烂做

etin

​艺人孙慧雪近年既拍剧又当主持、歌手及网红，曾被朋友揶揄“烂做”，力劝她建立鲜明形象，没料疫情突袭，她一个轻松转身就变阵在网上搵食，收入丝毫没影响，惟庞大工作量令一家人相处时间减少，3岁多的儿子因不舍妈妈返工而爆喊，令阿雪相当心痛。

忙于拍摄无綫节目《姊妹淘》的孙慧雪，早前客串处境剧《爱．回家之开心速递》，饰演任性富家女，由于从未演过该类角色，当日接到剧本时非常兴奋，不讳言仅参与一集未够喉，期望监制给予机会，安排多些戏份。

心痛少时间凑仔

早前阿雪开网店卖杂货、护肤品及零食等，她表示利润虽然不高，但认为可帮助小店，所以不介意，更说：“之前成日开直播，又喺唔同网上平台做嘉宾，虽然系疫情，但真系好彩冇影响收入。啲人话我烂做、唔够专，分辨唔到我边瓣，但当疫情嚟到时，我庆幸当初冇专注喺一瓣到，幕前冇工作就跳入网络搵钱。”由于忙得不可开交，照顾家庭的时间相对减少，结果囝囝以行动“投诉”，她说：“有一次出门口返工，佢发现之后，眼泪流晒出嚟，搞到我都好心痛，即刻上前揽住佢，冇计，依家香港地好多父母都系咁，惟有牺牲见朋友时间。（同老公分配时间？）佢好好，会接我收工争取时间见面，尽量喺车程入面倾，因为喺屋企个仔会争住黐我。”

计划开甜品网店

另外，谈到《姊》除了介绍潮流，阿雪与吴紫韵还有个煮甜品环节，她说：“成日要搵呢方面嘅资料，跟住喺甜品个基础上再加创意，平时有匿喺屋企练习，本身呢方面唔叻，只限蛋糕同朱古力，依家识整鸟结糖，所以我哋构思一齐开网店，或者喺市集开住先。（分工合作？）系，我哋一日要整好多个甜品，佢喺韩国学整花艺蛋糕，我都有跟佢学。”更指每日在甜品催谷下不自觉增磅，所以同时间努力戒食淀粉质，确保不会变大肥婆：“其实我由123磅减到依家114磅，只系上镜比其他主持肥，因为佢哋全部都好瘦，好在监制好好，每次安排我坐喺枱入面嘅位置，等我冇咁显肥。”