艺人余香凝去年尾闪嫁圈外有米男友陆政渡后才承认佗B,为宣传微电影《日子总有我伴你走》挺肚受访,孕肚微隆、四肢纤幼,可谓得天独厚。她透露戏中帮助患有失智症的长者完成心愿,就收到鲍起静(鲍姐)求助,希望做其孙女,陪伴她度过人生最后一段日子︰“角色做呢份工因为留有遗憾,婆婆走咗都冇陪到佢,中间同鲍姐有好多好感人嘅互动,潘灿良都有份演出,微电影片长16分钟,仲报名参加‘创+作’比赛,无论赢唔赢都好,呢个电影班底都已经赢咗!”而微电影更率先分别于《Top Shorts Film Festival 2021》及《Independent Shorts Awards (ISA)》荣获共6个大奖。
鲍姐坦指被剧本感动,又谓若然老来可以同角色一样预先安排“伴女”就非常满意︰“人老咗子女一定系走,尤其依家所有仔女都喺世界各地,就一定剩番班老人,同自己好相似,个女依家喺英国。(担心迟啲剩番自己?)我有啲担心㗎,但系担心我先生,如果我走咗剩番佢会好凄凉,反而剩番我系得,我好坚强,会同个女讲拣间好嘅老人院。”并说因不想成下一代的负担,搞笑话有相约老友于老人院见:“成日都有同余安安咁讲,我觉得我会好开心,识得有个Auntie喺老人院系会领导人哋唱歌。”
微电影3个多月前竣工,当时余香凝经已“粗身大势”,她笑说一空闲就被全Team下令去瞓觉:“佢哋好锡我,因为主景系屋企,唔使埋位就叫我入房瞓。(孕期有唔舒服?)嗰时个状态好好,做嘢都有精神,埋位前会同鲍姐讲做妈妈、家庭,我哋两个都系巨蟹座、都系好妈妈,哈哈!”惟问到佗B几多个月、预产期何时?她一律封口,只说希望一直工作至生B︰“会继续拍嘢,系工作狂,老公都好支持,如果有日好似鲍姐咁就好,老咗都仲咁恩爱。”鲍姐闻言即鼓励对方︰“起码都(生)两个!佢幸运呀,有人佗B系呕到七彩!小朋友有伴成长冇咁自私,自己又多一份开心。”余香凝乖乖听话连番说“好”︰“听鲍姐话,生多几个可以避免成故事中嘅独居老人,有多个陪住自己。”​
|