公开艺人衣帽间 冬天点着先最吸睛

etin

天气又再度转凉，冬天比夏天可以有更多配衬服饰嘅方法，艺人都有唔少冬季穿搭衣装嘅心得，就等一班型男索女同大家逐一分享！

陈家乐：“我冬天会锺意着牛仔褛或者皮褛，因为只要简单衬上一件白tee，已经可以带出型格又唔会过时，我偶像碧咸都系成日咁着，呢个系我好喜欢嘅配搭。”

黄又南：“着衫Layer好重要，好多时候室内同室外嘅温差好大，穿太多厚重衣服喺里面嘅话会容易焗亲，我试过，所以好清楚。有时候宁愿着薄但质地好嘅好似茄士咩羊毛衫喺里面，然后外面着大衣或者羽绒，咁入到室内就可以除外套。另外，冬天嘅衫一般色调比较深，可以着鲜色袜去调剂一下。”

胡定欣：“今个冬天都好寒冷，最锺意着樽领衫，再加件大褛或着件皮褛，对我嚟讲最重要护颈，所以成日会配搭条颈巾。”

胡杏儿：“冬天最锺意配搭唔少得大褛同长Boots，因为保暖，着出嚟好有型同埋好容易衬，系冬天必备嘅衣着。”

陈山聪：“通常冬天我比较锺意着黑色，而我衣柜入面有90%嘅衫都系黑色嘅，而长Boot亦系冬天必备嘅，夏天好难着到，一有长Boot就别具冬天味道，所以一有机会我就会着。”山聪又指最爱上身穿樽领冷衫，但现时香港好难买到靓的男装樽领衫，他谓：“好多品牌少入返嚟香港卖，可能香港天气唔系咁冻，所以我一去日本或者其他地方旅行，都会入货。”

吴业坤：“我服饰配衬系比较简单朴素，我系个怕冻嘅人，冬天会以保暖为主，点都会着番件大褛嘅，厚、薄就视乎天气再判断，但大褛系好好遮蔽身材嘅‘武器’，内面可能衬番针织嘅冷衫，因为想做啲层次，冷衫内面又可以着番件恤衫或打底衫；裤就衬番适合自己脚形嘅款式，再配番皮鞋或casual波鞋都得。”​