【圣诞报喜】胡杏儿宣布佗第3胎：愿望成真了！

etin

恭喜恭喜！育有2子嘅胡杏儿趁住昨日圣诞佳节喺网上报喜，宣布佗第3胎呀！佢上载一张坐喺圣诞树前手捧巨肚嘅独照，留言：“我来自一个有两个姐姐的家庭，从小就体会到三姊妹的好处，一直觉得如果能有3个孩子会是一件特别美好特别幸福的事。2020年的圣诞节告诉大家，愿望成真了❤️”

而老公Phil就透露老婆参加综艺节目时，拒绝畀人知道佗BB，因为唔想有“特权”，如常咁工作，大赞佢系超级老婆、超级妈妈、超级新抱、超级职业女性及演员同埋超级靓呀！唔少星妈包括陈敏之、陈凯琳等都留言恭喜佢哋！杏儿回覆指今次怀孕系计划之内，生仔定女都冇所谓，而预产期就系下年年头、年中：“圣诞节系一个同家人一齐欢度嘅开心日子，所以特别拣呢个日子同大家分享呢个开心消息！其实一直以来都希望有3个小朋友，依家如愿以偿都非常感恩。今次怀孕都算系计划之内，生仔或生女都冇所谓，最紧要健康。预产期大约明年年头、年中左右。”

佢仲自爆有晒经验，佗B冇觉得特别辛苦，之前工作时都冇人发现佢大肚添：“之前喺内地工作都冇同剧组透露怀孕一事，自己唔想有任何特权。我希望公平、公正下比赛，最后都攞到好成绩都好开心，而且有BB同二仔Ryan一直陪住自己！因为已佗第3胎，所以好有经验，冇觉得特别辛苦，基本上同其他怀孕女士一样，工作时都冇咩影响。而每次佗B都刚巧有工作在身，今次都唔例外，早已适应。而怀孕初期都冇特别现肚，冇人察觉！感谢BB好乖，我一直有喺内地做检查，好安全、好顺利。但现时疫情下都会分外小心。祝大家圣诞快乐！”

​据知，杏儿已安全返港，目前正在隔离中，31号仲会出嚟见人。

对于杏儿又有喜，好姊妹胡定欣说：“好开心，知道杏儿有第3个baby，都真系好惊喜，我哋都系同大家差唔多时间知，原来过去4个月佢佗住BB参加节目，其实同一班姊妹倾开，暗地里佢都感觉佢有啲孕味，因为记得之前佢佗bb时身体同样子嘅变化，但觉得应该唔系，原来真系，我哋又做契妈啦！杏儿系我哋非常敬重嘅偶像，事业家庭兼顾非常之好嘅女星，好叻！”

黄智雯则：“非常戥杏儿开心，当我哋知道时真系喜惊喜，佢真系一个Superwoman！”姚子羚亦谓：“好戥佢开心，寻日同我哋讲，觉得佢好劲，最犀利系可以佗住个肚去拍节目，仲要带住个仔，冇谂过系咁劲，拎埋奖又咁专业，呢个胡杏儿点解可以咁强！佢系我哋呢班姊妹嘅典范，好难得可以兼顾家庭同事业，佗B工作唔容易，为理想做到咁多嘢，已经好完美。”