傅颖“死过翻生” 想做就做但求无憾

etin

阔别香港电视萤幕多年的女星傅颖，演活话题性角色，表现亮眼获得好评，她更赞赏昔日旧拍档邓丽欣的演技。曾经梦见自己突然死亡的她，希望能在有生之年完成写下的清单，不让自己留下遗憾。

当年18岁以少女组合Cookies出道的傅颖，转眼间已成为熟女，她还记得第1日出骚的心情，为校花校草活动做表演嘉宾，她笑说：“我着咗件绿色吊带小背心加短裤，有个超级撒亚人头，咁就18年，孕育咗一个成年人嘅年纪。”对过去经历过的高高低低，她曾经有谂过离开这份工，但那念头只是一刹那，之后又突然有戏拍，也知道自己真的好锺意演戏，她说：“你要锺意做嗰样嘢，先会发现你真系唔会惊辛苦！”

做咗大众“老公”

​她因疫情留港，意想不到接拍了电视剧《熟女强人》，虽然剧集早已播毕，但她在剧中饰演双性恋的“关始立”，外间反应不错，其表现也受到赞赏，特别是观众对她的关注，她笑说：“喺网上平台度好多人嗌我做老公，之后又多咗个名叫‘渣渣关’，呢件事好得意。”

拍摄期间，她刻意打扮得男仔Feel：“我觉得自己有种着咩衫咩造型，一打扮就会好似嗰样，当时连（吴）千语都问我平时系咪唔会嗲男友，系咪好Man㗎？我一直冇好正面答佢，直至拍完套剧我哋互相关注社交网，佢觉得点解我会着粉红色衫，点解咁女仔，其实我希望喺嗰段时间尽量贴近番个角色呈现畀大家睇！”

摆脱是非变Open

以前经常负评缠身的她，因为这套剧跟何珮瑜、吴千语及曾乐彤等成为好友，反而没有闹出是非新闻：“我以前系好吸是非嘅体质，可能依家摆脱咗，我谂心态都系一个问题，依家唔会谂大家会唔会写到我唔好，或者锺意摆啲负面新闻喺我度。”她承认以前好收埋自己，不会主动去结识朋友，但现在变得“Open”了，搵到一种令自己开心的模式，在工作上更自在。

赞邓丽欣演技唔错

谈到与旧队友邓丽欣（Stephy）不和的旧闻，两人“破冰”后在社交平台互动，虽然称不上是老友，但共通点都是愈来愈爱演戏，Stephy近年在电影方面表现亮眼，曾夺香港电影评论学会的最佳女演员，并两度入围金像奖最佳女主角。

傅颖坦言有欣赏过对方主演的《空手道》及《女士复仇》，并赞赏“做得唔错”：“我觉得当年佢好细个嘅时候，做戏已经好有天分，10几年前Cookies第1套电影《九个女仔一只鬼》，我系一旧饭，仲未知喺度做紧乜，人哋叫我讲乜对白就讲乜，要咩表情就咩表情，我觉得佢系我哋最有Sense嗰个，知道自己做乜。”

唔一定要结婚生仔

太耐没有在港及用广东话演戏，最初傅颖都有担心，不过当正式埋位开工，她的担心即一扫而空：“始终系自己屋企地方，个感觉好自然去做呢件事，根本唔使担心任何嘢。”能够演出《熟》剧她觉得幸运，好开心多了观众认识她：“呢几年我不停拍嘢，但其实大部分都未出街。”

心态平和放开执着

虽然戏瘾大，但做演员好被动要睇机缘，她说：“以前见到有啲角色好锺意，如果争取到就好喇，但喺唔到你话事，依家我个心态系比较平和，冇咁执着，遇到锺意嘅角色或者人哋觉得我好适合呢个角色，我一定会尽自己最大努力去做。”

在等待的时间，她不会觉得太过煎熬，因为她的人生有太多事想做，她表示有一年新年没有返港，独留在北京看完整套《黄帝内经》中医书：“我喺度谂已经去到呢个年纪，我有啲乜嘢一定要做，跟住就写低晒，好多嘢想做，个List好长。”加上2017年她在横店拍戏，有2晚梦见自己突然死了，灵魂出窍，她第1句说话：“死啦！我仲有咁多嘢未做！”令她冲击好大，所以今世想做甚么，她都想做，尽量不让自己有遗憾。

“希望遇到爱嘅人”

不过结婚生仔并不在她的清单中，她笑说：“奇怪地冇，我都好希望可以遇到一个爱嘅人，同时间佢都爱我，但我冇写住要着白色婚纱入去教堂，我要结婚，呢个系一种仪式，但对于我嚟讲唔系咁重要。至于生细路仔，你要对佢一生负责，可能未遇到1个令我好想同佢生小朋友，所以我讲唔到呢样嘢。”她不怕死亡，因为她知道死了还要继续生存，只是换了另一个空间而已：“我个概念轮回系因为你有好多嘢未学识，所以要不停轮回去学你冇学识嘅嘢，我觉得我已经轮咗好多世，够了。”