光棍节好Lonely！朱晨丽冇人冇物 廖慧仪一个去旅行

etin

昨日系一年一度嘅“双11”，除咗要上网扫平货，仲系属于单身一族嘅光棍节，艺人们都有唔少“一支公”嘅时候，做过一啲好难忘嘅事，等佢哋同大家慢慢分享啦！朱晨丽：“最难忘系当初一个人嚟香港读书，因为未认识到朋友，可以话做咩都系自己一个，例如独自返屋企、食饭、搭车⋯等等。谂番起所有朋友都鸮上海，又挂住屋企，有时都难免伤感，觉得寂寞，好彩后来好快就识到新朋友，跟住就有人陪，做乜都唔使自己一个喇。”

廖慧仪：“几年前试过自己一个去韩国旅行，虽然只系2日，但系个感觉真系几lonely，因为咁啱系圣诞节，见到人哋都系一双一对，感觉就更加lonely，但系一个人旅行都系好好嘅经验，感觉会主动啲去识当地，将来都会再一个人去旅行，会去远啲可能欧洲。”

喺《爱．回家之开心速递》饰演大学生嘅叶茜文：“喺英国读书嘅时候，经常都自己一个人去唱K，自己一个人可以唱2、3个钟，都几享受独处嘅时间。”苏慧恩：“我试过一个人去唱K，读书时期好锺意唱歌，屋企又冇得唱卡啦OK，所以当时我一个星期会自己去1至2日唱K，可以练歌，我一个人可以唱几个钟，唱完就返屋企食饭。”​