薛嘉麟42岁生日 诸葛紫岐送爱畀老公

etin

Neway太子爷薛嘉麟日前42岁生日，太太诸葛紫岐悉心为他搞生日派对，相约久未相见的好友们一起庆祝，但在疫情之下仍做足措施，宾客们须要分枱坐。诸葛紫岐说：“因为疫情，好多朋友真系有超过大半年冇见，今次好似朋友聚会咁，又会带小朋友嚟，老公开心到都饮多咗几杯，都有少少醉意。我订咗两个生日蛋糕，超人蛋糕可以畀小朋友玩同食，另一个又啱大人食，而朋友都有送蛋糕，所以当日都切咗3个。超人当然系代表老公，我对佢嘅期望好简单，就系身体健康，知道佢要打理生意，又要睇住屋企，投入好多时间同心机，希望佢健康开心。（送咩礼物畀佢？）爱啰！爱比一切重要。”

结婚9年，连拍拖相知相爱超过10年，诸葛紫岐说不单有感时光飞逝，回首过去10年，觉得老公比以前不同：“佢男人魅力多咗，哈！男人魅力唔单只讲外表，而系一个人经过岁月同经验等等嘅历练，好似酒一样愈耐愈醇厚。好多人问我点样令爱情保鲜，我觉得大家唔止系老夫老妻，因为大家一齐经历同成长，所以唔同时候有唔同身份，例如拍档、朋友或情人，会好有默契，唔使多讲就知对方谂乜，有时又好似知己咁天南地北无所不谈。我性格较为男仔，所以我唔会做‘嫦娥’日哦夜哦，好小事都过问，我谂咁样反而畀大家更多空间。”​