有机会发展？方力申讲陈滢标晒汗

etin

艺人方力申去年参加环岛泳，筹得过千万善款，佢将过程拍成纪录片，昨日举行首播会，佢表示环岛泳令佢重新爱上游水，1星期最少游4、5次，今次筹款咁成功，本来亦有新挑战，佢话：“疫情第一波时，又冇得返大陆做嘢，冇工开，成日练水，就谂过不如游多次，由香港游去澳门，喺大屿山嗰边游过去，到最后依家连澳门都去唔到，唔通游完唔埋岸咩，所以要睇吓出年有冇契机做。（自掏腰包？）依家自身难保，要筹都筹畀自己先。（游水学校有冇蚀钱？）蚀咗77万之前政府资助咗30几万，依家蚀咗40几万，咁同我嘅　Partner一齐嘅，暂时都仲OK，唔会再需要攞钱出嚟。”

问到之前陈滢爆方力申曾经约佢单独食饭，似有意追求，佢就话唔系，至于佢哋有冇可能发展，佢话：“冇话冇可能嘅，暂时冇一齐食饭啰。（系咪因为佢有男朋友？）唔知喎，如果有男朋友就更加唔会约啦，电话都唔会攞。（所以你唔知道佢有冇男朋友？）佢咁秘密，我唔知。”方力申讲到出晒汗，不停搵纸巾抺汗。