空姐严选10大好客 古天乐最受欢迎

etin

新冠肺炎疫情影响下，航空业大受影响，不少机舱服务员首当其冲，加入失业大军。有离职的空姐化名“空姐阿Sa”，于网上频道分享在职期间遇到娱乐圈艺人的秘闻，揭开艺人“空中真面目”，严选“10大好客”及“最讨厌明星”，激赞古天乐最受欢迎，而舒淇非常友善，会主动撩空姐倾心事。

“空姐阿Sa”赞马德钟帅气兼双眼识放电，形容望着他犹如“好似想吞咗我落肚咁”。最令她难忘是已故艺人张国荣，为人友善和潇洒。最搞笑是有位乘搭长途机的男艺人，甫登机便主动与两位服务员表示：“好攰，唔影相，唔签名。”结果令两位服务人员摸不着头脑，皆因未能认出他是何方神圣。又有一位巨星在机上乱抛英文，说“I just want to pass away（我只想去死）”，实情只是叫人借过。她又开名赞吴君如是好雇主，与外佣出埠均同坐商务客位。另点名赞郑伊健、陈慧琳、蔡卓妍、谢霆锋、林峯、黄宗泽都是友善乘客，并选出10大好客，逐个品评！

第1位古天乐

佢坐过我由巴黎飞返香港航班，真系物以类聚，连个经理人都咁靓仔。古天乐份人好nice，全亚洲航空业界最多人锺意佢，可以话系最受欢迎艺人。

第2位舒淇

每次见佢都冇架子，唔会嘴藐藐、抬高个头唔望人嗰啲。佢份人好可爱，会主动同空姐倾偈，诚恳到连感情问题都会同我哋同事讲，不过当时佢应该唔系同冯德伦，但同边个我哋唔知。佢又曾经同空姐讲自己想过做空姐，但因为唔够高所以做唔到。

第3位张曼玉冇架子

来自香港嘅国际巨星张曼玉，当年同法籍男友拍拖，有次佢坐头等由香港飞去巴黎，唔知佢张头等机票系咪有赞助，竟然班机一起飞，佢即刻跑去经济舱陪男友坐。当值空姐都打个突，因为张头等机票点都要10几万港元，佢本身已经冇架子，又有礼貌，好多同事都好锺意佢。

第4位任贤齐好老公

有次香港飞台北，佢坐头等，同行太太和小朋友就坐商务位。航班起飞后，佢即刻走去商务位喂小朋友食嘢，临落机又跑去帮太太执行李，确保太太冇拎漏嘢，安安全全、整整齐齐咁落机，对家人照顾得好细心，绝对唔系扮出嚟。

第5位周润发肯认错

有次周润发系最迟一位客人上头等机舱，当时全机等佢一个，佢一上机即刻同机组人员讲唔好意思，因为上机前被粉丝包围签名，真系好有礼貌。有朋友同我讲，佢拍戏时都会帮剧组人员扫地，所以话一个人成功唔系冇理由。

第6位陈奕迅任人影

佢坐过我两次机，见佢系好静咁喺度睇电视。记得今年年头疫情前，佢喺巴黎飞返香港，由头瞓到落机，全程冇乜食嘢，最多拎杯水。临落机时，有同事叫佢合照，佢都答应，跟住一个跟一个排住影。事后同事睇番啲相，发现佢其实刚瞓醒，落机已经好攰，但都肯挤出笑容同我哋影。

第7位梁朝伟有风度

梁朝伟份人亲民诚恳，有次一位马来西亚籍空姐同事喺头等服务佢，佢对空姐好似朋友咁，讲过：“你知唔知我去日本滑雪时戴住晒啲装备，好多人唔认得我呀，不知几爽。”觉得佢讲嘢唔造作，仲会主动去厨房同空姐倾偈，唔系沟女嗰种，系好有风度。

第8位李心洁好斯文

李心洁讲嘢好斯文，好有文青感觉。有次佢同丈夫彭顺同埋继女一齐上机，佢全程对继女照顾得好好。之后佢先生出轨，见佢都表现得好淡然，唔会同记者讲啲乜，成功嘅人遇到绯闻都唔会特别回应。

第9位张学友劲识做

张学友有一次坐长途机去洛杉矶，佢个经理人好识做，一登机先去头等机舱个厨房同机组人员打招呼：“你哋好呀，今日张先生好攰，如果你哋想影相或签名，我谂佢今日唔方便。”回程时佢咁啱搭同一队crew嘅航班，经理人又主动同机组人员讲：“张生今日状态OK呀，如果想搵佢签名或影相，绝对冇问题。”抵佢红足咁多年。

第10位王菲似细路

当时系启德机场年代，有次王菲坐商务客位，佢好似细路女咁，一坐低轻轻搵只脚撑住前面嘅櫈背，不过当然佢唔系好大力，冇影响前面乘客。其实好多同事都服务过佢，觉得佢唔系好讲嘢、外表好cool，但其实内心好温柔，因为每次要求佢合照都有求必应。