同罗天宇情已逝！戴祖仪暗挞阔少被银弹攻陷

etin

现年25岁嘅戴祖仪身形高挑拥有一对煞食长腿，成功俘虏唔少宅男，就连罗天宇都系佢裙下之臣，不过早前女神就割席话“冇发展过”，昨日更有指两人一年情已经玩完，戴祖仪秘挞澳门阔少Michael Li。戴祖仪最近与日本艺术家桥爪悠也合作，为对方举行首个香港艺术展，但原来有指系Michael泵水畀女友，两人仲合作开公司，成功用银弹攻势冧掂热爱艺术嘅戴祖仪！

Michael从事艺术生意，几年前透过朋友认识戴祖仪，有指之后开始力追女神，但戴祖仪就系咁吊住对方瘾，未有立即答应拍拖！而喺Michael社交网所见，2018年1月佢曾与一女仔同游日本，仲Share亲密合照，但到8月时，佢已与戴祖仪结伴睇张学友演唱会，但两人都低调冇Post对方相。同年9月，佢哋去到张敬轩间餐厅食饭，Michael上载三人合照并留言：“I want nobody nobody but you👉🏻👉🏻@joeythyee”Tag住戴祖仪，摆明劲冧女神！

联络戴祖仪，佢就斩钉截铁咁否认绯闻，指对方系佢生意伙伴，又大嗌自己单身，更加话如果因为咁而冇人追就弊：“太假😂 唔想回应去煲件事～次次art show都会有Michael个名系每一个art show既foam board介绍翻佢同我系The real project既 co founder (我business partner)大家都有出钱，亦都落手落脚搞。今个月搞咗两个art show，对我来讲真系好大工程同好大付出，晚晚都处理到好夜先有得瞓。所以见到呢单新闻嘅时候，我都有啲唔开心。因为作一作就好似我无付出咁，但事实啱啱相反，大家都好努力好畀心机去做。我都想有人泵水畀我开公司呀😂！！！如果有人有呢个兴趣，请联络我！😂不过始终要作古仔都避免唔到，惟有自己再努力啲，做到啲成绩畀人睇😂同埋，我单身呀！！！！😂已经冇人追，一阵间更加冇人追点算！！！”之后佢又喺社交网上载照片，宣传艺术展：“最后重点：我 单 身　多谢”而Michael受访时，指自己是香港人，并否认恋情。

另边厢，失恋嘅罗天宇都不愁寂寞，10月1日33岁生日时就有一班兄弟陪伴，仲被指同另一女神苏皓儿（Chloe）打波打出感情来！​