系边个？廖慧仪自爆遭跟踪威胁恐吓性骚扰

etin

今届落选港姐廖慧仪，由参选到依家选完是非都未停过，风头仲劲过冠军谢嘉怡！继早前佢旧爱Sam发表分手文自爆被狠飞“点解你要咁对我”，搞到网友都觉得Sam好惨，更直觉分手一事同《#后生仔倾吓偈》嘅孔德贤（Danny）有关，不过廖慧仪就冇公开承认分手，连日来仲上载笑晒嘅照片，心情一啲都冇受影响。

事隔9日，廖慧仪表示社交网被hack说：“密码改几多次都无用，原来一直仲偷用紧我Email。跟踪威胁恐吓性骚扰，当街偷我电话跑走、捕我落堂、炸我Whatsapp，讲粗口闹我唔去见你，全日打几百个电话畀我打到我电话无电，出Post说我不是话要畀世人公审我，我被人骂唔紧要，呢啲人都系互不相识嘅人，佢哋根本唔知件事嘅来龙去脉，但唔好事后同我讲个Post唔系自己出，系Account被人Hack咗再搵朋友食死猫，扮到事不关己，扮呀妹扮朋友搵我，日日都玩跳楼，你要搞清楚，呢啲唔系爱嘅表现。”

佢再指其实成件事可以报警处理，佢再作出警告叫对方唔好再骚扰佢：“你要嘅解决方法我已经一早做咗，相已经DEL咗，唔该你唔好再骚我打扰我、我朋友同我屋企人，其实好多嘢已经可以报警处理，但谂吓点解我被你骚扰咗一个月我都无咁做。点解？我一路被陌生人人身攻击，我都无出声，成件事如果你系受害者，呢个唔系你最想要同埋最好嘅结尾咩？”而廖慧仪旧爱Sam就上载两张行山相，未知是否用行山疗情伤？

对于廖慧仪称有人“跟踪威胁性骚扰”，Sam全盘否认曾性骚扰对方，指同女友分手后，曾复合一至两日，但未几再分手，为箍煲只用“甜言蜜语”而已。佢话见女方态度绝情，感到痛不欲生外，承认有打过几百个电话，由于女方封锁佢嘅通讯方法，故透过亲朋嘅电话致电对方想说明一切。

Sam解释“跟踪”一事，话分手后因见女方对佢态度唔错，令佢以为感情有转机，故制造惊喜，喺女方不知情下，接送女方去教瑜伽班，但最后去错地方，并搵对方问清楚位置。佢承认分手后曾有轻生念头，但坚称唔系以此嚟威胁女方。

至于廖慧仪称佢个人社交帐户不断被入侵，指有人偷用其电邮，Sam只系话寻晚因想处理佢哋共同开设的短片频道，所以先登入女方嘅电邮外，又话双方同居达一年半，更指有日女方说很挂住佢，但同日晚上就玩失踪，跟绯闻男友孔德贤去行街睇戏。