萧正楠跟米芝莲大厨学艺 做港版木村！

etin

识煮几味的人夫萧正楠将获打造为“港版木村”，跟米芝莲大厨学艺！他将于myTV SUPER的新节目炮制Fine Dining（高级餐饮），有口福的老婆黄翠如自言最着数，老死曹永廉则警告他要学得好好睇睇，免得失礼！

新冠肺炎肆虐全球，近大半年航空业停摆，无綫旅游节目全数“冚旗”，节目选材本着“穷则变、变则通”的理念，有见人人留家抗疫下厨开餐，煮食节目应运而生。无綫落力打造一班星级厨神，如肥妈、李家鼎、黎诺懿、陈炜及江美仪等，他们的节目在“疫境”中大受欢迎，不少更乘势扩展饮食生意，财源滚滚来！

抄笔记明益老婆

有见及此，myTV SUPER以日本男神木村拓哉主演剧集《摘星厨神》为蓝本，推出自家制高档饮食节目《Testing Menu》，由萧正楠一连十集主持。今次阿萧有木村“加持”，还有机会跟多位米芝莲厨师学艺，升呢做“Fine Dining厨神”指日可待！

阿萧要从一个新手开始跟米芝莲厨师学厨，当中难免有压力，不过屡尝挫败正好是他把“烹调小宇宙”推向更高层次的原动力，他昨日受访时大呼兴奋：“迟啲会跟米芝莲学嘢，用最平嘅食材煮Fine Dining，真系好想学呀！咁难得佢哋将秘技教我，我会抄低笔记，将呢10集学到嘅再煮畀大家食，睇吓同之前有咩唔同，希望真系做到‘摘星厨神’！”阿萧的老婆黄翠如最有口福，她不禁笑说：“通常系佢负责煮，所以如果佢学到，我会好着数！”

​该节目昨日拍摄宣传片，爱下厨的阿萧表示：“没有不好的食材，只有劣质的厨师；食材本质不分贵贱，厨艺决定价值。”为了证明此言非虚，他在片中挑战以最少的食材，炮制最极致的味道，他为精致的菜肴命名后，将邀请星级嘉宾试食。

曹永廉泼冷水

曹永廉与阿萧向来老友，厨艺亦相当耍家，问到可有获邀试菜？他即抵死说：“老老实实，我就未食过佢煮嘅嘢，可能我当运、好彩啦！话佢煮得好叻喎，佢老婆咁瘦，佢自己又唔肥，好食极有限啦！（佢扮木村煮Fine Dining！）今次佢做呢个节目，仲要扮木村，我觉得有少少侮辱啰……希望佢做得好啲啦！人哋木村煮嘢真系做得好细致㗎，平时见佢（阿萧）都系煎吓鸡翼，未必出到大场面！不过咁……可能最近佢学咗啲好嘢，但我煮嘢一定叻过佢，如果搵我上去节目令佢冇面，呢个我就最担心！”