厕所厨房成日有怪声 孙慧雪屋企闹鬼赶极唔走

etin

踏入农历7月，又系鬼门关大开嘅日子，就算自己冇亲身灵异经历，点都会听人哋讲过嘅，特别系艺人，成日周围飞工作，真系乜鬼都可能见过，昨日三位靓女艺人，孙慧雪、黄文意同高海宁就同大家分享灵异经历。

孙慧雪：“我屋企之前有两位工人姐姐，当时有一日两个人一齐同我讲，太太我觉得你屋企有啲嘢，其中一个姐姐话瞓觉时见到有个女人企喺出面，另一个话见到有个女人喺我间房出面行过，玩具同电视经常自己开同熄，佢哋有一次，一个喺房，一个喺厨房，佢哋听到电视突然开咗，佢哋走出厅问系咪对方开，但都唔系对方开，佢哋又经常听到厕所有扭门声。我依家新请嘅姐姐，同之前两个工人姐姐唔识，但新姐姐都话成日听到有人扭厕所门。

我听完佢哋讲，我会谂可能佢哋谂多咗啫！直到有一晚，我老公出咗去同朋友饮嘢，得我同我个小朋友，当时好夜，我凼紧小朋友瞓觉，我哋有个音乐公仔，每晚都开着凼小朋友瞓觉，当时佢已经瞓着咗，我就熄咗个音乐公仔放喺床头，突然我个小朋友起身好大声咁喊，同时间个音乐玩具着咗放音乐，我嗰刻起晒鸡皮，我当时有啲惊，之后同老公讲，佢话我谂多咗。后来因为长辈好担心，佢哋请咗个风水师傅嚟帮我哋睇，师傅入到厕所，佢话起晒鸡皮，话个厕所有嘢，要帮我哋赶走佢，我哋就由得佢做个仪式。本身我同老公系教徒，所以唔系特别惊。

其实最近都系成日听到跌嘢声，一到夜晚就听到厕所同厨房有呯呯嘭嘭声，似系有人好大力将啲好重嘅嘢掟落地嘅声，但第二日见到厕所啲嘢系好整齐，唔似有事发生，有一次我唔喺屋企，我老公喺厅睇电视，佢听到厨房呯呯嘭嘭，似有人掟嘢，佢听到两三次，佢即刻打畀我叫我早啲返嚟。”

黄文意行山路撞嘢

黄文意就分享校园鬼古，当年佢就读中大听到耳边有把女仔声：“记得有一晚，夜晚十点几，我喺图书馆温完书出嚟，拣咗条山路走，因为行山路感觉上快过行大马路，我行行吓突然间出汗，谂住搵纸巾，但嗰阵其实出汗都觉得好奇怪，因为嗰阵天气好冻，我搵紧纸巾嘅时候，听到有个女仔喺我隔篱话：‘咦，又系你呀？’我就谂唔通我有同学咁啱咁夜一齐落去搭车？跟住我360度咁望，人影都冇一只。但系呢件事唔只发生喺我身上，我有个师兄试过，喺中大点打火机，又听到一把声问佢：‘可唔可以借个火畀我呀？’，佢一望又系周围都冇人，佢即刻惊到跑返去宿舍。”

高海宁全家出事

高海宁就话自己冇乜遇过灵异事件，但妈妈去旅行时就遇到过，她说：“我自己好少遇到，但我阿妈遇过，一家人旅行去箱根浸温泉，间酒店喺山谷，我哋间房喺最底嗰层，打开门对住一个好阴深嘅厕所。我同阿妈一间房，去浸温泉经过隔篱房冇关门，我妈八卦话间房冇人，但有人用日文闹交。去到夜晚瞓觉，我完全冇事，阿妈对住窗瞓，话瞓瞓吓唔郁得，见到有个着住和服、冇眼耳口鼻嘅女仔企喺窗望住佢，我阿妈话好惊眯埋眼，但想再睇多眼，发觉佢已经企喺我妈面前，想挣扎但郁唔到，一到天光郁到即刻拍醒我去Daddy间房，原本要住多晚，但都坚持要走，离开咗箱根先讲畀我哋听咩事。”

高海宁又指后来返到香港成家人继续黑气纒身，她说：“返到香港，Daddy爬高攞嘢，感觉有人推佢，挞咗落地下，医咗好耐先好番。两个细佬返学去厕所感觉被推，一个撞到下巴、一个撞眼眉。我返到嚟发高烧唔退，后来妈去拜神先退烧。”​