藝人黃心穎大露背出席商場活動,全程被司儀把她與馬國明的戀情擺上枱,就連插住氣球盆栽上的揮春,亦被悉心挑選有「馬」及「明」字的字句。及後,同場的唐詩詠寫了「笑口常開」揮春,表示望契哥馬國明成日笑口常開,並輕拍身旁的心穎謂:「靠你嘞!」
唔好意思要多份生日禮物
事後心穎笑指非首次被玩,故已成習慣,認為最重要大家覺得開心,談到本用23日29歲生日,心穎透露暫未有人約:「今年生日前都忙,好攰,自己又唔鍾意開party。(同馬國明二人世界囉!)可能簡單食餐飯,佢都應該會同我食嘅!(禮物呢?)我嘅生日比較尷尬,好近情人節,唔好意思要人分開咁多份。(一份過重手啲?)係嘅,我都諗唔到想要咩,平時見到鍾意都會自己買。」
問到若馬國明拎視帝是否其最好的生日禮物?心穎笑到四萬咁口謂:「係㗎!係幾好嘅一樣嘢!(開心過自己收禮物?)可能係㗎!我同身邊朋友戥佢緊張,呢樣嘢比起攞唔攞獎更寶貴,有就係bonus。(到時會開心到喊?)我會避開鏡頭,唔知乜反應,可能開心或者唔開心,寧願天然呆,呢個表情百搭嘅,返去練吓先!」
談到早前到歐洲旅行,心穎即一臉冧爆笑容表示與好朋友同行,問到是否與馬國明蜜遊,心穎未有否認謂:「哈哈!總之好好玩,我未去過歐洲,嗰度好舒服同優閒。(去完感情增進?)有嘅!(了解更深?)一定係,可能嚇怕咗佢呢!(新年帶馬國明去婆婆度拜年?)婆婆喺鄉下,太早嘞,遲啲先啦!」
|