《詭探》邵仲衡演茅山師傅要睇心理醫生

藝人邵仲衡、尹揚明及車保羅等今日齊齊現身茶果嶺，拍攝ViuTV劇集《詭探》，劇情交代扮演茅山師傅的邵仲衡扶乩協助警方破案。

邵仲衡表示今次拍劇，事前有睇美劇及日韓懸疑劇以作參考，劇組亦有安排演員們往見心理醫生取經：「佢哋啲budget 多到好似冇地方使咁。（酬勞好高？）合理囉。喺心理醫生度我都學多咗了解自己，企喺唔同角度了解事物。（自己有冇試過去扶乩問事？）咁又冇，但以前拍戲見過拍檔喺度狂揼地，啲工作人員又冇阻止佢，仲搞到滿頭大汗添。我諗呢樣（扶乩）同茅山儀式都係一門技術，我頭先（拍戲）扮（扶乩），腦內都有畫面，見到啲好靚嘅風景。」他指劇集預算拍至7月，目前幕後工作人員已著手撰寫第2季劇目。

車保羅戲癮大發

車保羅同樣扮演茅山術士，最後被至親謀害。他自言多年前拍過無綫劇後便絕跡，這是「出山」第一部作品：「戲癮發，流晒鼻涕喇。」他更笑言希望大家多給機會工作搵錢：「做咗爺爺開支大，又欠老婆一粒（鑽）石。（工餘忙湊孫？）唔得，我返工朝九晚六，凌晨5點幾就要起身，放工錫吓佢都要休息啦，好彩個孫出世4磅幾，而家都養返大舊啲。（返工點拍嘢？）我平時OT多，大把假可以請，互相配合啫。」