今日ViuTV免費電視99台開節目發佈會，更搵咗林保怡做主持，而周家怡亦去撐場

admin

電盈旗下、前名係「香港電視娛樂」、一條以粵語廣播為主嘅免費電視頻道——ViuTV，嚟緊4月6日正式開台。其ViuTV免費電視99台係利用大氣電波播放，3月31日就會透過固網傳送，而使用數碼電視機嘅觀眾可以喺4月2日重新搜台試播，而4月6日先迎接電視真開始。

今日ViuTV免費電視99台喺尖沙嘴開節目發佈會，公佈節目內容，更搵咗林保怡做主持，而周家怡亦去撐場，揚言希望為市民提供「真係選擇」，而無綫今日差唔多時間亦搞活動介紹新網上平台，似乎免費電視大戰一觸即發，均係揀同一日嚟宣佈。
ViuTV今日呢個記者會，唔少客戶擠滿現場。記招由香港電視娛樂有限公司ViuTV經理魯庭暉介紹一系列娛樂主打嘅節目，佢哋嘅黃金時段由每晚6點至翌日凌晨12點45分，播出超過6個半鐘嘅全新首播節目。ViuTV亦標榜不論外購戲劇或自製劇集，只做「一線劇」，話晒網民一直無綫一台獨大，拍劇是是旦旦，呢句「只做一線劇」，未知係唔係暗寸無綫呢!

到底有咩選擇咁巴閉呢？佢哋主打娛樂綜藝節目，當中最爆的就係《跟住矛盾去旅行》，會搵水火不容嘅人物一齊去旅行，而即將登場嘅就係長毛梁國雄同曾鈺成波蘭之旅，至於之前林日曦同蔣麗芸嗰集就末知幾時推出，此外仲有邵音音X戴夢夢、連詩雅X葉蘊儀、HOCC X 高晧正、海星校長X補習天后Amanda等等，絕對比四個伯伯一齊去旅行有gimmick。
另外由全女班嘅真人格鬥節目《G1格鬥會》，搵嚟一眾女藝人互相以MMA競技，都相當有睇頭。
仲有《Barter Game價值連城》會搵嚟任賢齊、梁漢文、劉心悠等等，用以物易物方式去世界各地遊歷，仲有《同2047特首上學去》都會搵馬浚偉、鄒凱光等等體驗小學生校園生活。除此之外，仲有一系列嘅真人騷節目《慳啲啦 Honey》及《煮吧！換左我阿媽》。而最令觀眾振奮嘅，一定係每周六嘅十一點九會有平時要俾錢喺now先有得睇嘅西甲直播。

ViuTV當然都有新聞時段及財經節目，新聞時段分晨早新聞、午間新聞、6點及8點新聞報道，而黃金時段為六點至十二點九。周一至周五主打8點半至10點的皇牌日韓台劇集，當中的《太陽的後裔》及《回來吧！大叔》都係韓國熱播中嘅劇集，ViuTV將會係緊隨韓國播放。其後嘅就係一小時嘅娛樂綜藝節目，11點仲會播放自製實況劇集。