|
今日亞視執行董事葉家寶接受本報專訪,繼續講有關亞視存亡之事。
最近香港電視方面有興趣將旗下劇集放喺亞視播放,每月有墊底費500萬之餘,廣告亦五五分帳,港視主席王維基同亞視都幾多淵源,但每次合作似乎都係差啲嘢,好似亞視特登避開唔合作咁,問到係有傳因為亞視唔想得罪梁振英,所以唔同維基合作,葉家寶就話呢個係謠言,佢話如果真係咁講,當初亞視投資者同大股東就唔會接受王維基開出嘅主要條款(指買起亞視)。
葉家寶又話一直冇時間,今早董事局先開會決定,會盡快約見王維基,話港視劇集喺亞視播,始終係單方面意向,要再傾細節,佢又話:「500萬補底費唔足以維持亞視一個月嘅營運開支,都要搵啱嘅節目,係咪合適喺大氣電波播放。」
問到佢今朝董事會蔡衍明同王征有冇出席,葉家寶就話本人冇,但有代表出席。佢透露目前為止,唔見「蔡王」二人有再投資嘅意向。想有奇跡發生?葉家寶話:「一直以嚟,有其他人幫亞視整新節目,落廣告,除咗王維基有意合作之外,仲有徐小明財團,今日都有傾電話,建議有啲製作,提供節目,有信心營運好,但一切都要由大股東去傾,睇接唔接受,胡景邵方面,因為佢有兩樣嘢考慮,第一樣,係我哋嘅固定傳送者牌照(再申請已被否決)或內地落地權。」
有傳亞視已將大埔總台,以一億港元按俾銀行,葉家寶承認有人曾經提議過願意做呢個按揭,但係因為亞視要得到科技園管理公司批准,先可以有呢個動作,暫時亞視未有按大埔總台。
|
|