早前在无綫剧集《美丽战场》中饰“徐富贵”一角令人气再升的林盛斌(Bob),接受林柏希主持的网上节目《月倾会》访问,生意及投资多多的Bob,被问到身家多少?他说:“我觉得如果当我变卖晒所有嘅资产,咁我谂可能我唔做嘢一段长嘅时间,而维持到依家嘅生活,都应该去到细仔中学毕业咁!(个个话你身家过亿?)大概8位数字!” ​对于“徐富贵”一角大受好评,问到有否机会角逐台庆最佳男配角殊荣,他说:“我希望系嘅,咁起码知道原来有机会最后五强喎,其中一个系自己嘅话呢,经已系胜出了!”对于被网民封他和刘佩玥为“最强CP”,Bob笑说:“平时多数都系插我多㗎嘛!激进少少讨论区嗰一两个呢,佢赞我喎!估唔到嗰个肥X都可以,咦,都感动到喎,佢喺度回顾番自己嘅故事,喂,我眼湿湿喎!”
另外,Bob被问到入行以来最难堪的一次,他说某年在颁奖礼后台,要找某歌手录新年贺语,“我走埋去,我好有礼貌好客气:‘可唔可以录一录呢段呀?’一睇,跟住有个小小嘅啧(一声),掉走咗去喎!我睇到张纸飘落地,佢又行开咗,我唔知佢有心定无意,定唔小心跌咗,跟住之后个唱片公司话sorry sorry,我谂都知佢脾性,我心谂佢都几大支嘢喎!(男歌星?)当时得令啦,又靓仔又剩!”
身为“金牌媒人”的Bob,说最难撮合的艺人是方力申:“无论系我电话同佢讲,定真人同佢讲,我话:‘喂,睇吓吖,呢个真系几好,同埋佢对你有好感呀!’佢话唔好啦!大佬,你连交友app都有玩,点解你唔要个朋友brother去介绍一个几好嘅?佢又成日话唔好,扭拧都唔紧要,咁你对自己有要求,想要搵个更加好,但连呢个开放嘅机会唔去试下吓,都话好似唔系好好!”
和太太感情要好的Bob,被问到最激嬲老婆的一次,他说:“啱啱结婚冇耐,同几个朋友夹份开酒吧要应酬,咁嗰阵又开紧咪,开完咪之后又要去喇,有时真系饮到天光,朝头早先有机会返到屋企,仲要断晒片!我试过去咗个衣柜度,以为系厕所屙咗笃尿,屋企个门口又试过,睡房门又以为系厕所,有好几个月,嗰段时间就系我老婆话得我最紧要嘅时侯!”Bob续说一直想演纯爱剧:“即系《Love Generation》(恋爱世纪),木村拓哉加松隆子嗰啲喎,我哋以前读书睇嗰啲,哗,点解咁好睇㗎!我做木村拓哉唔知有冇人想睇?(女主角属谁?)倪晨曦,佢真系嗰种散发出嚟,大家会想望佢,就系嗰种仙气啦!”
|