歌手雨侨去年8月为老公罗力威诞下女儿罗约弥(Harper),暂时做全职妈妈照顾囡囡嘅佢,经常喺社交网分享凑B生活,经常被“投诉”BB唔肯瞓觉,令佢大感无奈。原来BB电力十足,系遗传自爸爸罗力威,虽然佢表示已经有晒心理准备,但人仔细细嘅Harper“攻击力”相当强劲,搞到一家人都凑到病,佢喺社交网留言:“由于听过老公嘅家人、同学、老师,讲述老公嘅超活跃童年,我对于将来我哋个BB已经好有心理准备,不过嚟到6个半月,妈妈有时都要做嘢,而帮手凑嘅公公、婆婆、uncle、auntie个个凑到残嘅残、病嘅病,或者即刻打嚟叫我接番走佢,大家都表示十分顶唔顺!” 凌晨1点仲好精神 原因系Harper唔单止要抱,仲要畀佢系咁跳,搞到雨侨非常无奈,上载2张Harper喺凌晨1点,仲好精神唔肯瞓嘅相,叫其他妈妈要加油:“如果你唔制止佢,其实佢一日可以跳500下,而如果你放低佢,佢会即刻跌落地。你以为BB一定会瞓,佢可能9个钟之后先会瞓,你夹硬放落床,就会好似片中咁继续跳跃,你行开佢就会企图爬出嚟…暂时未投降嘅就得番姑妈。如果你都有同款BB,you are not alone!我哋一齐加油!”
|